नेकपा एमालेले पर्यटनमन्त्री प्रेम आलेलाई स्टन्टबाजी मन्त्रीको संज्ञा दिएको छ ।
कांग्रेस सभापति शेरबहादुर देउवा नेतृत्वको सरकार बनेको ६ महिना पुगेको अवसरमा एमाले अध्यक्ष केपी शर्मा ओलीले आइतबार एक विज्ञप्ति जारी गर्दै प्रेम आलेलाई स्टन्टबाजी मन्त्रीको संज्ञा दिएका हुन् ।
नारायणहिटी प्रकरण, पशुपति धर्मशालालगायतका विषयमा छानविन गरेपछि चर्चामा रहेको आलेलाई ओलीले विज्ञप्तिमा स्टन्टबाजी मन्त्रीको संज्ञा दिएका हुन् ।
विज्ञप्तिमा आलेको नाम नलिएर ललिता निवासमा संलग्नलाई उन्मुक्ति दिने खतरनाक प्रपञ्च गरिएको, त्यस्ता विषयबाट ध्यान विकेन्द्रित गर्न स्टन्टबाजी मन्त्री परिचालन गरिएको र विपक्षी दलका नेतालाई बदनाम गर्ने सुनियोजित षड्यन्त्र भइरहेको आरोाप लगाएका छन् ।
विज्ञप्तिको १३ नम्बर बुँदामा भनिएको छ, ‘ललिता निवासको १४३ रोपनी सरकारी जग्गा हिनामिनासँग सम्बन्धित विषयमा नेपाल प्रहरीको केन्द्रीय अनुसन्धान ब्युरोले दुई वर्षभन्दा बढी समय लगाएर गरेको अनुसन्धान र त्यसमाथि आधारित भएर अगाडि बढाइएको मुद्दालाई ‘थप अनुसन्धान’का नाममा सरकारी वकिल कार्यालयमार्फत फिर्ता गराएर सरकारी सम्पत्ति हिनामिनामा संलग्नहरुलाई उन्मुक्ति दिने खतरनाक प्रपञ्च गरिएको छ। यति गम्भीर विषयमा गरिएको षड्यन्त्रबाट ध्यान विकेन्द्रित गर्न कतिपय मन्त्रीहरूलाई विभिन्न ‘स्टन्टबाजी’मा परिचालन गरिएको छ र विपक्षी दलका नेताहरुलाई बदनाम गर्ने सुनियोजित षड्यन्त्र भइरहेको छ। आफैँ अनियमिततामा संलग्न हुने अनि बेथितिबाट ध्यान अन्यत्र मोड्नका लागि सस्तो प्रचारबाजीमा उत्रिने गैरजिम्मेवार काम भइरहेको छ। कसैद्वारा पनि अनियमितता भएका छन् भने त्यस्ता विषयमा निष्पक्ष छानबिन हुनुपर्छ र दोषी ठहरिएमा प्रक्रियासम्मत रुपमा कानुनी कारवाहीको दायरामा ल्याउनुपर्छ। तर, राजनीतिक इबी साध्न र शुभलाभका लागि ‘ब्ल्याकमेल’ गर्ने, उद्यमी–व्यवसायीहरूलाई तर्साउने, बार्गेनिङ गर्ने र मुख्य मुद्दाहरुलाई ओझेलमा पार्ने कुरा स्वीकार्य हुन सक्दैन ।’
