छिमेकी देश भारत लगायत विभिन्न देशमा कोरोना भाइरसको तेस्रो लहर सुरु भएका बेला त्यसको बेवास्ता गर्दै सयौँ सुदूरपश्चिमेली काम खोज्नका लागि दिनहुँ भारत पस्न थालेका छन् । कोरोनाकै कारण स्वदेश फर्किने सङ्ख्या पनि दिनहुँ बढ्दै गएका बेला भारत पस्नेको सङ्ख्या पनि कमी छैन् ।
यहाँका गाउँघरमा खेतीपातीको काम सकिएपछि गाउँमा रोजगारी नपाउँदा यहाँका वृद्ध, महिला, बालबालिका तथा युवा काम खोज्नकै लागि भारतका विभिन्न सहर जाने क्रम निकै बढेको हो । अहिले यहाँको मुख्य नाका गौरीफन्टाबाट भारत पस्नेको दिनहुँ भिड लाग्ने गरेको छ ।
कोरोना महामारी कै बिच दैनिक सयौँ सुदूरपश्चिमेलीहरु भारत पस्न थालेका छन् । स्वदेशमा रोजगारीका कुनै पनि अवसर नभएपछि फेरि ज्यानको बाजी राखेर भारत जानुपर्ने बाध्यता भएको उनीहरूको दुखेसो छ । गाउँमा बस्दा रोगले भन्दा भोकले मर्ने अवस्था सृजना हुन थालेपछि आफूहरू मुग्लान पस्नु पर्ने बाध्यता आएको आएको उनीहरू बताउँछन् ।
सुदूरपश्चिम प्रदेशको बाजुरा, अछाम, बझाङ, डडेल्धुरा, दार्चुला, बैतडी तथा डोटीलगायतका जिल्लाका नागरिक कामकै लागि बर्सेनि भारत जाने परम्परा छ । यहाँका नौ जिल्लामध्ये सबैभन्दा बढी अछाम, बाजुरा तथा डोटीका नागरिक कामका लागि बढी भारत पस्ने गरेको पाइएको एक तत्थ्याङ्कले देखाएको छ ।
