मधेस प्रदेशसभामा रिक्त ३ संसदिय समितिको सभापति पदको लागि सोमवार ५ जनाको उम्मेदवारी परेको छ ।
प्रदेशसभामा रिक्त रहेको सार्वजनिक लेखा समिति, कृषि तथा भुमि व्यवस्थापन समिति र प्राकृतिक श्रोत तथा वातावरण समितिमा सभापतिको पद खाली छ ।
प्रदेशसभाको सुचना अनुसार तिनै समितिमा सभापतिको लागि उम्मेदवारी दर्ता गराईएको हो ।
प्रदेशसभा सचिवालयका अनुसार प्राकृतिक श्रोत तथा वातावरण समितिमा नेकपा माओवादी केन्द्रका प्रदेशसभा सदस्य जगत प्रसाद यादवको मात्र उम्मेदवारी परेकोले उनि सभापति पदमा चयन हुने निश्चित भएको छ ।
त्यस्तै प्रदेशसभाको सबैभन्दा प्रभावकारी समितिको रुपमा रहेको सार्वजनिक लेखा समिति तथा कृषि तथा भुमि व्यवस्थापन समितिमा २–२ जनाको उम्मेदवारी परेको छ ।
सार्वजनिक लेखामा सत्तारुढ गठबन्धनको तर्फबाट नेपाली काँग्रेसका प्रदेशसभा सदस्य नरेश कुमार यादव तथा लोकतान्त्रीक समाजवादी पार्टी (लोसपा)–नेकपा एमाले मोर्चाबाट लोसपाका प्रदेशसभा सदस्य प्रह्लाद गिरीले उम्मेदवारी दर्ता गराएका छन् ।
त्यस्तै कृषि तथा भुमि व्यवस्थापन समितिमा सत्तारुढ गठबन्धनको तर्फबाट नेकपा एकिकृत समाजवादीका प्रदेशसभा सदस्य मदनसेन श्रीवास्तव तथा लोसपा–एमाले मोर्चाबाट एमालेकी प्रदेशसभा सदस्य जगतारन देवी गोढिनले उम्मेदवारी दर्ता गराएकी छिन् ।
संसदिय परम्परा अनुसार प्रमुख प्रतिपक्षी दललाई सार्वजनिक लेखा समितिको सभापती पद दिईने चलन ईत्तर सत्ता गठबन्धनले नै उम्मेदवारी दिएपछी अन्य समितिहरुमा समेत दुई मोर्चाको उम्मेदवारी परेको हो ।
लोसपाले यसअघी सार्वजनीक लेखामा आफ्नो दावेदारी दिएको थियो । तर सहमती नहुँदा एमालेसंग गठबन्धन गरी छुट्टै उम्मेदवारी दिएको हो ।
मधेश प्रदेशसभामा हाल ७ वटा संसदिय समिति छन जसमध्ये ३ समितिका सभापतिको पद खालि छ ।
समितिमा भएकै सदस्यको बहुमतले सभापति चुनिने प्रावधान अनुसार ति समितिहरुको सभापती चुनिने प्रदेशसभा सचिवालयका सचिव रञ्जित यादवले बताए ।
प्राकृतिक श्रोत तथा वातावरण समितिमा एकजनाको मात्रै उम्मेदवारी परेकोले उनि सर्वसम्मत हुने निश्चित भईसकेको यादवले जनाए ।
सार्वजनिक लेखा र कृषि समितिमा भने बहुमतिय प्रकृया अनुसार सभापति चुनिने छ ।
यस्तो छ समितिको तथ्यांक
सार्वजनिक लेखा समितिमा १३ जना सदस्य छन् । जसमध्ये सत्तारुढ गठबन्धनमा रहेको जसपाको ५, काँग्रेसको ३ तथा माओवादीको १ जना प्रदेशसभा सदस्य छ । त्यस्तै लोसपाको ३ तथा एमालेका १ जना सदस्य छन् ।
जम्मा ११ सदस्य रहेको कृषि तथा भुमि व्यवस्थापन समितिमा गठबन्धनमा रहेको जसपाको ४, काँग्रेसको १, माओवादीको १ तथा नेकपा (एस) को २ सदस्य छन् । उक्त समितिमा लोसपाको २ तथा एमालेका १ जना सदस्य छन् ।
यसरी ति समितिहरुमा बहुमतिय प्रकृयामा गएर सभापतिको चयन गरिए गठबन्धनले जित्ने पक्कापक्की छ ।
