जन्ती बोकेको ट्याक्टर दुर्घटना हुँदा बिहीबार एक जनाको मृत्यु भएको छ । मृत्यु हुनेमा त्रियुगा नगरपालिका १४ का १९ वर्षीय मिलन मग्राती रहेका छन् ।
ट्याक्टरमा सवार १९ जना घाइते भएका छन् । घाइतेको उद्धार गरेर उपचारका लागि उदयपुर अस्पताल लगिएको छ ।
त्रियुगा नगरपालिका १६ रातमाटेबाट जन्ती बोकेर उदयपुरगढीको नेपालटारतर्फ जाँदै गरेको प्र २–०१–००१ त १०९६ नम्बरको ट्याक्टर मदन भण्डारी राजमार्गको उदयपुरगढी गापा–७ नागबेली भन्ने ठाउँमा दुर्घटना भएको थियो ।
ट्याक्टर अनियन्त्रित भएर दुर्घटना भएको र घटनाबारे थप अनुसन्धान भइरहेको जिल्ला प्रहरी कार्यालय उदयपुरले जनाएको छ ।
