आन्तरिक कलहमा पिरोलिएको जनता समाजवादी पार्टी (जसपा) को सर्लाहीमा समानान्तर जिल्ला कमिटीमा गठन भएको छ ।
तत्कालिन संघीय समाजवादी फोरम र राजपा मिलेर बनेको जसपाको जिल्ला कमिटीमा आफुहरुलाई वेवास्ता गरेको भन्दै पुर्व राजपा निकटका नेताहरुले समानान्तर कमिटी गठन गरेका हुन् ।
जिल्ला नेतृत्व चयनमा तत्कालीन संघीय समाजवादी पार्टीका नेताहरुले पार्टी कब्जा गर्ने निति अनुरुप राजपाका नेताहरुलाई समावेश नगरेको भन्दै समानान्तर कमिटी गठन गर्नुपरेको नवगठित कमिटीका संयोजक कौशल किशोर राय यादवले बताए ।
सोमवार यादवको संयोजकत्वमा २ सय ५१ सदसिय जिल्ला कमिटी गठन गरिएको हो । जिल्ला कमिटी गठन प्रकृयाप्रती पटकपटक ध्यानाकर्षण गराउँदा समेत बेवास्ता गरिएपछि समानान्तर कमिटी गठन गर्नुपरेको यादवको भनाइ छ ।
समानान्तर कमिटीका अध्यक्ष बनेका यादव कृषिमन्त्री महेन्द्र राय यादव पक्षधरका हुन् । उपेन्द्र यादव पक्षधरका नेताहरुले एकलौटी रुपमा पार्टी सञ्चालन गर्न खोजेपछी उनिहरुले सामानान्तर कमिटी गठन गरेको बताएका छन् ।
यसअघी जसपा मधेश प्रदेश अध्यक्ष रामबाबु कुमार यादवले विधान विपरीत उपेन्द्र पक्षका नेताहरुलाई मात्रै समावेश गरेर जिल्ला नेतृत्व गठन गरेको उनिहरुले आरोप लगाएका छन् ।
केहिदिनअघी सर्लाहीमा उपेन्द्र यादव निकट मानिएका विरेन्द्र यादवको नेतृत्वमा जिल्ला कमिटी गठन गरिएको थियो ।
स्मरण रहोस मधेस प्रदेशकै पर्सा जिल्लामा उपेन्द्र पक्षका रामनरेश यादवलाई हटाएर त्यहाँका सांसद प्रदिप यादव निकटका मंजुर अंसारीको अध्यक्षतामा नयाँ कार्यसमिति गठन गरिसकिएको छ ।
उक्त समितिलाई लिएर जसपाको प्रदेश समितिकै पदाधिकारीहरुमा विवाद रहेको छ । जसपाको केन्द्रमा देखिएको गुटबन्दी जिल्ला स्तरमै आएपछी बिक्षिप्त भएका नेता कार्यकर्ता अन्य पार्टीमा प्रवेश गर्ने लहर नै चलेको छ ।
