मधेश प्रदेशका मुख्यमन्त्री लालबाबु राउत गद्दीका स्वकीय सचिव दीपक यादवले विद्यालयसँग भरपाई लिएर साइकल वितरण नगरेको पाइएको छ ।
स्वकीय सचिव यादवले ३ महिना अगाडी पर्सा जिल्लाका केही विद्यालयसँग साइकल उपलब्ध गराई दिन्छु भनी भरपाई लिएर साइकल वितरण नगरेको पाइएको हो ।
मुख्यमन्त्री राउतको लोकप्रिय कार्यक्रम “मुख्यमन्त्री बेटी पढाउ, बेटी बचाउ” अभियानअन्र्तगत यादवले पर्साको जिराभवानी गाउँपालिकाका ३ वटा विद्यालयसँग भरपाई गराएर साइकल उपलब्ध नगराएको विद्यालयको व्यवस्थापन पक्षले जनाएको छ ।
यादवले पर्साको जिराभवानी गाउँपालिका वडा नम्बर १ स्थित श्री नेपाल राष्ट्रिय आधारभुत विद्यालय कठकुइँया, वडा नम्बर ३ नवकाटोलास्थित श्री वितो महतो जनता माद्यामिक विद्यालय र वडा नम्बर ५ शंकरसरैयास्थित श्री सरस्वती आधारभूत विद्यालयसँग साइकल उपलब्ध गराए वापतको भरपाई लिकर साइकल दिएका छैनन् ।
कागजी प्रक्रिया मिलान गर्नुपर्ने भन्दै यादवले विद्यालयको आधिकारीक लेटर प्याडमा साइकल वितरण भइसकेको भन्दै भरपाई गराएर केही दिनभित्रै साइकल उपलब्ध गराउँछु भनेर आश्वाशन दिएको ३ महिना बितिसकेको वितो महतो माद्यामिक विद्यालयका प्रधानाध्यापक रामाशंकर प्रसाद चौधरीले बताए । यादव बेटी पढाउ, बेटी बचाउसँग आबद्ध नभएपनि उनले आफ्नो कार्यक्षेत्र बाहिर गएर विद्यालयसँग भरपाई गराएका छन् ।
जानकारहरुसँग बुझ्दा यादव मुख्यमन्त्री राउतको स्वकीय सचिव भएपनि उनलाई प्रदेश सरकारले चलाएको अभियान तथा कार्यक्रमहरुमा कुनैपनि प्रकारको आधिकारीक हस्तक्षेप गर्ने अधिकार छैन । यद्दपी, यादवले आफ्नो अधिकार क्षेत्र बाहिर गएर विद्यालयहरुसँग भरपाई बुझेर एउटा कागजको टुक्रामा टोकन दिएका छन् ।
साइकलका लागि फोन गर्दा यादवले १ हप्ता भित्र हुन्छ भनेर टार्ने गरेको विद्यालयका प्रधानाध्यापकहरुको गुनासो छ । “साइकल कहिले पाउँछ भनेर सोध्न मुख्यमन्त्रीका स्वकीय सचिव दीपक यादवलाई फोन गर्दा उनले अर्को १ साता भित्र हुन्छ भन्ने गरेका छन्, त्यस्ता कयौँ एक साता बिते अहिलेसम्म साइकल आएन” अब त उनले फोन नै उठाउँन छोडेका छन् ।” प्रधानाध्यापक चौधरीले भने ।
शैक्षिक सत्र २०७७/७८ मा कक्षा ८ मा अध्ययनरत छात्राहरुलाई साइकल वितरण गर्ने योजनाअनुरुप जन्मदर्ताको प्रतिलिपि, नाम, रोल नम्बर, ईआईएमएससहितका विवरण लिएका विद्यार्थीहरुले साइकल कहिले पाउँछु सर ? भन्दै प्रश्न गर्दा आफु अनुत्तरित हुने गरेको कठकुइँया आधारभूत विद्यालयका प्रधानाध्यापक कृपासिन्धु प्रसाद पटवारीले बताए ।
पटवारी थप्छन्, ‘साइकल बुझिसक्यौ भनेर भरपाई बनाइदियौँ, साइकल लिनका लागि दिएको टोकन कतै हरायो कि भन्ने डरले सताईरहन्छ ।, ४÷५ दिन बिराएर उक्त टोकन हेरिरहन्छु ।’ भरपाई गराइसकेपछि मुख्यमन्त्री लालबाबु राउतका स्वकिय सचिव दिपक यादवले हस्ताक्षर गरेर ओम सत्य साई प्रा.लि. वीरगञ्जमा गएर साइकल लिन भनेपनि त्याहाँ पुग्दा साइकल नभएको विद्यालयका प्रधानाध्यापकहरुले बताए ।
२०७८ असोज १३ गते अख्तियारले मुख्यमन्त्रीको बेटी पढाउ, बेटी बचाउ कार्यक्रममा अनियमितता भएको भन्दै मुख्यमन्त्रीको कार्यालयमा छापा मारेको थियो । अख्तियारलाई कागजी रुपमा प्रमाण पेश गर्नका लागि साइकल प्राप्त गर्न निवेदन दिएका सबै विद्यालयहरुलाई जिल्ला समन्वय समिति पर्सामा बोलाएर एकैदिन सबैसँग भरपाईसमेत बनाउन लगाइएको रहस्य बाहिरिएको हो ।
साइकल वितरण अभियानअन्र्तगत प्रति साइकल लगभग साढे ७ हजारका दरले बिल बनाइएको छ । सोहीअनुसार बिते महतोमा ४२ थान, कठकुइँया आधारभूत विद्यालयमा २१ थान र सरस्वती आधारभूत विद्यालयमा २० थान गरेर जम्मा ८३ थान साइकल ३ महिनासम्म पनि वितरण भएको छैन । यात्रा डेलीलाई प्राप्त जानकारीमा ३ वटा मात्रै भएपनि जिल्लाका अन्य विद्यालयमा पनि यस्तै घटना भएको हुन सक्ने बुझिएको छ । कागजी रुपमा बुझिसकेको देखाउने र ति साइकल मध्यस्तकर्ताहरुले पचाउन खोजेको हो कि भन्ने आशंका पनि उब्जिएको छ ।
मुख्यमन्त्री राउतले साइकल वितरण र बेटी पढाउ, बेटी बचाउ कार्यक्रमा कुनै अनियमितता नभएको दावी गरेपनि आफ्नै गृह जिल्लामा उनको निर्देशनमा स्वकीय सचिव दीपक यादवले ३ वटा विद्यालयलाई ठगेका छन् ।
साइकल वितरण नगर्दै साइकल बुझिसकेको भनेर भरपाई लिनुले यसमा अनियमितता भएको अनुमान लगाउन सकिन्छ । मुख्यमन्त्रीको कार्यालयले साइकल लिनका लागि ८ कक्षासम्म पठनपाठन हुने विद्यालयले निवेदनसहित माग गरेपछि विद्यालयको सिफारिसका आधारमा १ देखि २ हप्ताभित्र साइकल वितरण गर्ने गरिएको उक्त कार्यक्रमका पर्सा जिल्ला संयोजक आमोद यादवले बताए । निवेदन दिएको १५ दिनपछि ६ थान साइकल प्राप्त गरेर मात्रै भरपाई दिएको वीरगञ्जको गहवास्थित श्री बालविद्या मन्दिर इन्दुलाखे आधारभुत विद्यालयका तत्कालिन प्रधानाध्यापक चन्देश चौहानले बताए ।
पर्सा जिल्लाभरीमा कति वटा विद्यालयलाई कति थान साइकल वितरण गरिएको हो भनेर तथ्याङ्क माग गर्दा मुख्यमन्त्री राउतका स्वकिय सचिव दिपक यादव भोली दिन्छु भन्दै पन्छिन खोजेका छन् । पटक–पटक फोन सम्पर्क गर्दा पनि नउठाउने र उठाएको बेला व्यस्त रहेको भन्दै अरुलाई उठाउन दिनुले यादव पन्छिन खोजेको स्पष्ट भएको छ । यता, बेटी पढाउ, बेटी बचाउ अभियानकी सहजकर्ता प्रियंका यादवसहित कार्यक्रमको वेवसाइटमा रहेका सबै नम्बरमा पटक–पटक फोन गर्दा पनि फोन उठेन । यात्राडेली डटकमबाट ।
