एमाले नेता डा.भीम रावलले अध्यक्ष केपी शर्मा ओलीलाई देशको पक्षमा बोलेर महाहिरो बनेर देखाउन चुनौंती दिएका छन् ।
एमसीसीबारे धारण सार्वजनिक गर्न मंगलबार आयोजित पत्रकार सम्मेलनमा ओलीले रावल हिरो बन्न खोजिरहेको बताएका थिए । ओलीको उक्त भनाइको प्रतिक्रिया दिँदै रावलले महाहिरो बनेर देखाउन चुनौंती दिएका हुन् ।
उनले ट्वीट गर्दै भनेका छन्, ‘राष्ट्रिय स्वाधीनता र हितको पक्षमा जननिर्वाचित प्रतिनिधिको कर्तव्य अनुरुप संसदमा बोल्दा मैले ‘हिरो’ हुन खोजेको भनी मन पोलेको भए पार्टी अध्यक्षले आफै देशको पक्षमा बोलेर ‘महाहिरो’ हुनुभएको भए म खुशी नै हुने थिएँ । देश पार्टी र व्यक्तिगत स्वार्थभन्दा धेरै माथि हुन्छ, चेतना भया ।’
एमालेको विधान, प्रतिवेदन र संगठनात्मक प्रस्तावले एमसीसीसंगको सम्झौताबारे स्पष्ट धारणा बनाई राष्ट्रिय हितको पक्षमा उभिन निर्देशित गर्ने र आफू पार्टी सिद्धान्त अनुरुप उभिएको रावलको दाबी छ ।
संसदमा छलफलमा सहभागी हुन नदिनु आत्मकेन्द्रित, आत्मप्रचारक सोच र पार्टीको सिद्धान्त, र नीति विपरीत रहेको उनले बताएका छन् ।
एमसीसी पास हुँदा अन्य सांसद नाराबाजी गरिरहेका बेला रावल भने छलफलमा सहभागी हुँदै विरोध जनाएका थिए ।
