फागुन २८ गते नेकपा एमालेका अध्यक्ष केपि शर्मा ओलिको उपस्थितिमा एमाले प्रवेश गर्नलागेका बाराको एक गाउँपालिकाका अध्यक्षलाई जनता समाजवादी पार्टी (जसपा) ले पार्टीबाट निस्काशित गरेको छ ।
बाराको आदर्श कोतवाल गाउँपालिकाका अध्यक्ष मुस्तुफा अंसारीलाई जसपा बाराले पार्टीको साधारण सदस्य समेत नरहने गरी निस्काशित गरेको हो ।
पार्टी बिधान विपरित कृयाकलाप गरेको भन्दै अध्यक्ष अंसारीसंग मागिएको स्पष्टिकरण चितबुझ्दो नभएको भन्दै उनलाई निस्काशित गरिएको जसपा बाराका अध्यक्ष अजय पटेलले बताएका छन् ।
तत्कालिन संघीय समाजवादी फोरम (हाल जसपा) बाट अध्यक्ष पदमा निर्वाचित भएका अंसारी आउँदो फागुन २८ गते एमालेमा प्रवेश गर्नलागेको बताएका थिए ।
उनले परिवर्तित राजनितिलाई आधार बनाएर पार्टी परिवर्तन गर्न लागेको बताएका छन् ।
जसपाभित्र उपेन्द्र यादवको एकलशाही प्रवृति हावी भएपछी पार्टी छोड्नेहरुको क्रम बढेको छ ।
अंसारीले ओलिको सहभागितामा एमाले बाराले गर्ने पार्टी प्रवेश कार्यक्रममा आफ्ना सयौं कार्यकर्तासंगै पार्टी प्रवेश गर्नेछन् ।
