सदरमुकाम फुङ्लिङ बजारको कोप्चे डाँडालाइनमा आगलागी भएको छ ।
शुक्रबार बिहान आगलागी हुँदा एकघर पूर्णरुपमा जलेर नष्ट भएको छ भने एकघरमा आंशिक क्षति भएको छ ।
उक्त आगलागीमा परी एकजना वृद्धा घाइते भएको प्रहरीले जनाएको छ । शरीरको अधिकांश भाग जलेको बताइएको छ । घाइते वृद्धालाई उपचारका लागि जिल्ला अस्पताल लगिएको र उनको आकस्मिक कक्षमा उपचार भइरहेको अस्पताल स्रोतले जनाएको छ ।
आगलागीको कारण खुलेको छैन । फुङ्लिङ नगरपालिकाको वारुणयन्त्र (दमकल), नेपाल प्रहरी, सशस्त्र प्रहरी, नेपाली सेना र स्थानीयले आगो नियन्त्रणमा लिएको ताप्लेजुङका प्रहरी प्रमुख डीएसपी बालनरसिंह राणाले जानकारी दिए ।
