सरकारले आगामी आर्थिक वर्षको बजेटको तयारी थालेसँगै संवैधानिक आयोग प्राकृतिक स्रोत तथा वित्त आयोगले विभिन्न सूचकका आधारमा प्रदेश र स्थानीय तहमा जाने वित्तीय समानीकरण अनुदानको सीमा तय गरेको छ ।
आयोगले शुक्रबार मात्रै तथ्य र सूत्रका आधारमा समानीकरण अनुदानको सीमा तय गरेको हो । उक्त अनुदानको सिफारिसका लागि मानव विकास सूचकांक, आर्थिक सामाजिक असमानता, पूर्वाधारको अवस्था, राजस्वको अवस्था र खर्चको आवश्यकता तथा राजस्व उठाउन सक्ने क्षमता गरी पाँच वटा शीर्षक तय गरी मूल्यांकन गरिएको छ ।
सो मूल्यांकनका आधारमा सात प्रदेशले कूल ४३ अर्ब ७७ करोड रुपैयाँ तीन लाख र स्थानीय तहले ७० अर्ब आठ करोड ९९ लाख रुपैयाँ पाउनेछन् । यस आधारमा समानीकरण अनुदानतर्फ संघीय सरकारले एक खर्ब १३ अर्ब ८६ करोड दुई लाख रुपैयाँ बराबरको बजेट उपलब्ध गराउनेछ ।
आयोगले मानव विकास सूचकांकमा १०, आर्थिक सामाजिक असमानतामा पाँच, पूर्वाधार विकासतर्फ १० प्रतिशत बराबरको भार तय गरेको छ । पूर्वाधारमा सडकको घनत्व, विद्युत्को सुविधा, सूचना प्रविधिको पहुँच, खानेपानी र सरसफाइलाई उपसूचकमा राखिएको छ । राजस्वको अवस्थामा पाँच प्रतिशत र खर्चको आवश्यकता र राजस्व उठाउन सक्ने क्षमतामा ७० प्रतिशत सूचकको भार राखिएको छ ।
आयोगका अनुसार वित्तीय समानीकरण अनुदान सिफारिस गर्दा प्रदेशका हकमा जनसंख्या र क्षेत्रफललाई समान भार दिइएको छ । स्थानीय तहको हकमा सिफारिस गर्दा जनसंख्यालाई मुख्य आधार बनाइएको छ । प्रत्येक स्थानीय तहलाई न्यूनतम अनुदान सिफारिस गर्दा १० हजारभन्दा कम जनसंख्या भएका स्थानीय तहले कम्तीमा दुई करोड ७५ लाख रुपैयाँमा नघट्ने गरी अनुदान पाउनेछन् ।
आयोगका अनुसार १० हजारभन्दा कम जनसंख्या भएका स्थानीय तहको संख्या ४७ छन् । १० हजारदेखि २० हजार बराबरको जनसंख्या भएका स्थानीय तह १९० छन् । ती स्थानीय तहले न्यूनतम तीन करोड बराबरको वित्तीय समानीकरण अनुदान पाउँछन् ।
२० हजारदेखि ३० हजार बराबरको जनसंख्या भएका स्थानीय तह २०६ छन् । ती स्थानीय तहले न्यूनतम तीन करोड २५ लाख रुपैयाँ बराबरको वित्तीय समानीकरण अनुदान पाउँछन् । आयोगका अनुसार ३० हजारदेखि ४० हजार बराबरको जनसंख्या भएका स्थानीय तह १२० छन् । उनीहरूले समानरूपमा तीन करोड ५० लाख रुपैयाँ बराबरको न्यूनतम वित्तीय समानीकरण अनुदान पाउँछन् ।
कूल ७५३ वटै स्थानीय तहले पाउने न्यूनतम वित्तीय अनुदानको सीमा तय गरी आयोगले सरकारलाई सिफारिस गरेको छ । सोही आधारमा नै उनीहरूले बजेट प्राप्त गर्नेछन् ।
