काठमाडौं उपत्यकाको सडक चोकचोकमा थुप्रिएको फोहोरको व्यवस्थापन हुन एक साता लाग्ने भएको छ ।
चैत महिना लागेसँगै उपत्यकाको सडक छेउछाउमा थुपारिएको फोहोर चार दिनदेखि व्यवस्थापन गर्न थालिएको छ । चैत महिनामा चार दिन र गत फागुनमा २३ दिन विभिन्न वहानामा फोहोर व्यवस्थापन हुन सकेन । लामो समयदेखि फोहोर रोकिएको हुनाले नियमितरुपमा व्यवस्थापन कार्य हुँदा पनि एक साता लाग्ने कामपा वातावरण विभागका प्रमुख सरिता राईले जानकारी दिइन् ।
‘घरबाट फोहर बाहिर निकाल्दैमा फोहोरको व्यवस्थापन हुँदैन, सडकमा जथाभावी फोहर हुनु भनेको पनि थप समस्या हुनु हो’, प्रमुख राईले नागरिकलाई आग्रह गर्दै भनिन्, ‘फोहरको गाडी लिन आएपछि मात्रै घरबाट फोहोर निकालेर व्यवस्थापन गर्नु सहज हुन्छ ।’ फोहोर व्यवस्थापन गरिँदै आएको स्थान सिसडोलका स्थानीयले फोहर विसर्जन गर्ने ठाउँ नुवाकोटको सिसडोलसम्मको बाटो कालोपत्र गर्नुपर्ने माग गर्दै स्थानीयवासीले गरेको आन्दोलनका कारण फागुन १ गतेदेखि उपत्यकाको फोहोर उठ्न सकेको थिएन ।
त्यसैगरी पछिल्लो समय निर्माणाधीन बञ्चरेडाँडाका स्थानीयले निर्माणस्थल वरपरका जग्गा अधिग्रहण गर्नुपर्ने, स्थानीयलाई निःशुल्क स्वास्थ्योपचार गराउनुपर्नेजस्ता माग राखेका छन् । सहरी विकास मन्त्रालयले निर्माणाधीन दीर्घकालीन फोहर व्यवस्थापनस्थलमा पहिलो सेलको काम सम्पन्न भएको भन्दै फोहोर राख्न मिल्ने जनाएको छ ।
हाल फोहर व्यवस्थापनस्थल सिसडोल भरिएको र निर्माणाधीनस्थलमा पनि फोहोर राख्न सुरु गर्नु पूर्वनै स्थानीयको अवरोधले काठमाडौं उपत्यकाको फोहोर व्यवस्थापनमा थप समस्या हुने देखिएको कामपाको भनाइ छ ।
उपत्यकामा दैनिक एक हजारदेखि एक हजार २०० टनसम्म फोहोर निस्कने गरेको छ । उपत्यकाका १८ स्थानीय तहको फोहोर सिसडोलमा व्यवस्थापन गरिँदै आएको छ । यी सबै फोहोर निजी र महानगरका गरी दैनिक २०० भन्दा धेरै टिपर–ट्रकबाट लगिनेछ ।
