मधेश प्रदेशका मुख्यमन्त्री लालबाबु राउत गद्दी र संघीय सांसद प्रदिप यादवले संयुक्त रुपमा विरगञ्जमा मानव सेवा आश्रम भवनको शिलान्यास गरेका छन् ।
सडकमा अलपत्र परेका बेसाहारा मानिसको स्याहार तथा औषधि उपचारको व्यवस्था गर्दै आएको मानवसेवा आश्रमको वीरगञ्जका लागि बन्ने भवनको शिलान्यास आज (शुक्रवार मुख्यमन्त्री गद्दी र सांसद यादवले गरेका हुन् ।
विरगञ्ज महानगरपालिकाले उपलब्ध गराएको करिब १८ कठ्ठा जग्गामा भान्छा घर, तालिम हल, सहयोगापेक्षीलाई राख्ने कोठाहरु, हेरचाहमा खट्नेहरुका लागि आवास र आश्रममा आउने पाहुनाका लागि अतिथि गृहसहितको भवन निर्माण गरिने आश्रमका प्रदेश संयोजक देवेश गुप्ताले बताएका छन् ।
आश्रमभित्र घुमघाम गर्नका लागी पार्क र अन्य रचनात्मक गतिविधिका लागि खाली स्थानको संरक्षण समेत गरिने गुप्ताले बताए । निर्माण हुनलागेको आश्रम भोजपुरी कला सँस्कृतिलाई झल्काउने, वातावरण सुहाउँदो र भूकम्प प्रतिरोधी हुने छ ।
करिब १८ करोड अनुमानित खर्च लाग्ने आश्रमका लागी मधेश सरकार, विरगञ्ज उपमहानगरपालिका तथा संघीय संसद प्रदिप यादवले सहयोग गर्ने भएका छन् ।
मुख्यमन्त्री गद्दीसंगै सङ्घीय सांसद यादव र विरगञ्ज महानगरपालिकाका मेयर विजयकुमार सरावगीले समेत जग हालेका हुन् ।
सांसद् यादवले आगामी संसदिय कोषको बजेटबाट मानवसेवा आश्रमको भवन निर्माणका लागि विशेष बजेट छुट्याउने प्रतिबद्धता जनाएका छन् ।
तिन वर्ष भित्र निर्माण सम्पन्न हुने भवनमा गर्मिमा शितल र जाडोमा न्यानो दिने प्रविधि रेम्ड अर्थ प्रविधि प्रयोग गर्न लागिएकोे हो ।
