नेपाल कम्युनिष्ट पार्टी माओवादी केन्द्रका अध्यक्ष पुष्पकमल दाहाल प्रचण्डले आफू माओवादीको मात्रै नभई देशकै अध्यक्ष भएको बताएका छन् ।
आज भरतपुरमा भरतपुर महानगरपालिकाको नयाँ प्रशासनिक भवनको शिलान्यास गर्ने क्रममा बोल्दै उनले माओवादीले इतिहासमा गर्दै आएको काम र योगदानको मूल्याङ्कन गर्न सुझाव दिए ।
उनले अहिले देशलाई संकट पर्दा आफूले समस्या समाधान गरेको बताए । उनले भने, ‘म माओवादी केन्द्रको अध्यक्ष मात्रै जस्तो लाग्दैन आज भोलि, राष्ट्रको जिम्मेवारी मेरो टाउकोमा छ । देशमा कुनै अप्ठ्यारो प¥यो भने बचाउनै पर्ने नबचाई नहुने भारी बोकेर हिँडेजस्तो लाग्छ ।’
प्रत्येक पटक देशमा संकट आउँदा आफूले टार्दै आएको उनले बताए । स्वर्गीय गिरिजाप्रसाद कोइरालाले सहकार्य सहमति र एकताको मूल मन्त्र अनुसार भनेको कुरा काँग्रेसले बिर्सेको तर आफूले सोही बाटो अपनाउँदै आएको उनको भनाइ थियो ।
स्व कोइरालाले जीवनको उत्तरार्द्धमा आफूले दिएको देशको जिम्मेवारी पुरा गर्दै आएको समेत उनले बताए ।
उनले आगामी निर्वाचनमा काँग्रेस सहकार्य नभए पनि आफूलाई कुनै आपत्ति नभएको समेत बताए । ‘अहिले आजभोलि केही साथीहरू भन्न थाल्नुभा छ मिलेर जाने होइन आ–आफ्नो ढङ्गले जानुपर्छ’, उनले भने, ‘ठिकै छ आफ्नो आफ्नो ढङ्गले गए पनि जान दिनुपर्छ, हामीलाई आपत्ति छैन । आफ्नै ढङ्गले गएको भए देशमा शान्ति हुन्थ्यो ? आफ्नै ढङ्गले गएको भए संविधान बन्थ्यो ?’
