देशभरबाट मतपेटिका ल्याउन ढिलाइ हुँदा नेपाल बार एसोसिएसनको मतगणना मङ्गलबारदेखि मात्र शुरु हुने भएको छ ।
देशभरका ३५ मतदानस्थलमध्ये ३२ वटाबाट आइसकेको र बाँकी धनकुटा, राजविराज र सिरहाबाट सोमबार आइपुग्ने भएसँगै निर्वाचन समितिले गणना मङ्गलबारदेखि गर्ने तयारी शुरु गरेको निर्वाचन अधिकृत उषा मल्लले जानकारी दिइन् ।
मतगणनासँगै मतपरिणाम बुधबार विहानसम्ममा सार्वजनिक गरिसक्ने गरी तयारी गरेको मल्लले बताइन् । काठमाडौं उपत्यका बाहिरको मतदानस्थलमा तीन हजार २०२ र काठमाडौं उपत्यकाभित्र चार हजार २२७ गरी जम्मा मत सात हजार ४२९ मत खसेको छ ।
बारमा निर्वाचनमा भाग लिने जम्मा मतदाता ९ हजार ६०७ थिए । यीमध्ये दुई हजार १७८ जना मतदानमा सहभागी हुन सकेनन् ।
बार एसोसिएसनको २६ औं अधिवेशनबाट नयाँ केन्द्रीय समिति चयनका लागि शनिबार देशभर मतदान सम्पन्न भएको थियो ।
