प्रमुख निर्वाचन आयुक्त दिनेश कुमार थपलियाले वैशाख ३० गते हुन लागेको स्थानीय तहको निर्वाचन सम्पन्न गराउने दायित्वलाई संवेदनशील भएर पुरा गर्न प्रमुख निर्वाचन अधिकृत तथा निर्वाचन अधिकृतहरूलाई आग्रह गरेका छन् ।
निर्वाचन आयोगले विराटनगरमा आज आयोजना गरेको निर्वाचन सञ्चालन तथा व्यवस्थापन सम्बन्धी प्रादेशिक प्रशिक्षक प्रशिक्षण कार्यक्रममा बोल्दै उनले स्थानीय तहको निर्वाचन निष्पक्ष, स्वतन्त्र एवं मितव्ययी बनाउनुपर्नेमा जोड दिए ।
निर्वाचन सम्पन्न गराउने महत्त्वपूर्ण जिम्मेवारी तपाईँहरूको काँधमा आएकाले अहिले देखिनै मतदान केन्द्रमा खटिएर स्थानीय समुदायसँग समन्वय गरी काम अघि बढाउन उनले निर्देशन दिए ।
उनले स्थानीय तहको निर्वाचनका लागि आयोगले संविधान र कानुनअनुसार सबै प्रक्रिया अगाडी बढाएको उल्लेख गर्दै अहिले निर्वाचनको उत्कर्षमा आएर जनप्रतिनिधिले पुरा अवधि काम गर्न पाएनन् भन्ने कुराको कुनै तुक नभएको बताए ।
तोकिएको मितिमा निर्वाचन गराउन निर्वाचन आयोग लागिरहेको भन्दै उनले निर्वाचन रोक्ने र निर्वाचनको मिति सार्ने कुरा अब सम्भव नभएको बताए । निर्वाचन लोकतन्त्र र मुलुकको समृद्धिको संवाहक भएकाले निर्वाचन सफल बनाउन सबै लाग्नुपर्ने उनले बताए ।
उनले निर्वाचन आचारसंहिता पूर्ण रूपले कार्यान्वयन गर्न सक्रिय भएर लाग्नसमेत उनले निर्देशन दिए ।
