नेकपा माओवादी केन्द्रका अध्यक्ष प्रचण्डले गठबन्धनका दल साझा चुनाव चिन्हमा लड्ने छलफल चलिरहेको बताएका छन् ।
आज पत्रकार सम्मेलन गर्दै उनले गठबन्धनबीच जुन स्थानीय तहमा जुन पार्टीको प्रमुख छ, उसैको चुनाव चिन्हमा लड्ने छलफल चलिरहेको बताएका हुन् ।
तर, उनले निर्वाचन प्रक्रिया अगाडि बढिसकेकोले गठबन्धनका दल साझा चुनाव चिन्हमा लड्ने सहज भने नभएको बताए ।
उनले वैशाख ३० मा हुने स्थानीय तह निर्वाचन नसर्ने बताए ।
प्रचण्डले अर्थमन्त्री फेर्न कुनै सम्भावना नरहेको स्पष्ट पारे ।
प्रचण्डले गठबन्धनले औपचारिक निर्णय गरिसकेपछि दलगत असन्तुष्टिले खासै असर नपर्ने बताए । अध्यक्ष प्रचण्डले ५ दलबीच तालमेल हुँदा केही असन्तुष्टि देखिएपनि त्यसले परिणाममा असर नपर्ने दाबी गरे ।
प्रचण्डले अबको चुनावमा सत्तारुढ ५ दलको वाम–लोकतान्त्रिक र एमाले नेतृत्वको ‘होलीवाइन राजामहाराजाहरूको गठबन्धन’ बीच प्रतिस्पर्धा हुने बताए ।
प्रचण्डले आज बेलुकासम्म गठबन्धनमा महानगर र उपमहानगरपालिकाको भागबण्डा टुंगो लाग्ने समेत जानकारी दिए ।
उनले माओवादीलाई भरतपुर महानगरपालिका नै चाहिने अडान नलिएको बताए । साथै, उनले गठबन्धनका सबै दलबीच सहमति नभए जुन जुन पार्टीबीच सहमति हुन्छ, ती पार्टीबीच गठबन्धन हुने बताए ।
उनले ६ मध्ये ३ महानगरपालिका कांग्रेसले, र माओवादी, जसपा र समाजवादीले १–१ महानगरपालिका पाउने सहमति हुन सक्ने बताए ।
आज बिहान बसेको गठबन्धनको बैठकमा सिट बाँडफाँडबारे सहमति जुट्न नकसेपछि आजै फेरि बस्दैछ ।
