आगामी बैशाख ३० गते हुनलागेको स्थानिय निकाय निर्वाचनमा उम्मेदवार हुने पत्रकारहरुको सदस्यता स्वतः खारेज हुने नेपाल पत्रकार महासंघले निर्णय गरेको छ ।
बिहीबार बसेको महासंघको भर्चुअल बैठकले महासंघमा आबद्ध पत्रकारहरु उम्मेदवार बने सदस्यता खारेज हुने निर्णय गरेको हो ।
महासंघले कुनै पनि संरचनामा रहेका पदाधिकारी वा सदस्यहरू उम्मेदवार बनेमा महासंघको विधानको मर्म र व्यवस्था अनुसार सोही समयदेखि कायम रहेको पदबाट स्वतः मुक्त हुन जाने निर्णय गरेको छ ।
निर्वाचनमा महासंघका सबै सदस्यहरूलाई पत्रकार आचारसंहिताको पालना गर्दै तटस्थ भूमिका निर्वाह गर्न महासंघले अपिल समेत गरेको छ ।
महासंघको सदस्यता प्राप्त गरेका कोही पनि सदस्यले निर्वाचनमा उम्मेदवार बन्न चाहेमा महासंघको गरिमा, साख र साझा चरित्रको ख्याल गर्दै सदस्यता परित्याग गरेर मात्रै उम्मेदवार बन्न पनि महासंघले आग्रह गरेको छ ।
