२०२० को चर्चित सामाजिक हास्यव्यंग्य विधाको कमेडी वेब सिरिज ‘पञ्चायत’को सिक्वेलको रिलिज हुने मिति घोषणा भएको छ। अमेजोन प्राइममार्फत प्रदर्शनमा आउने ‘पञ्चायत २’लाई लिएर सम्पूर्ण तयारी पूरा भएको हो।
सिरिज मे २० बाट अमेजोन प्राइममा स्ट्रिमिङ हुँदैछ। मंगलबार अमेजोन प्राइमले दिएको जानकारी अनुसार सो दिनबाट सिरिज विश्वभर स्ट्रिमिङ हुँदैछ।
दीपक कुमार मिश्रको निर्देशनमा रहेको यो सिरिज सामाजिक कथावस्तुमा आधारित रहेर व्यंग्यात्मक शैलीमा कथा भनिएको छ। इञ्जिनियरिङ गरेको अभिशेक (जितेन्द्र कुमार अभिनित पात्र) सरकारी जागिरे भएर फुलेराको पञ्चायत कार्यालयमा गएपछिको कथालाई सिरिजले देखाएको छ।
सिरिजको पहिलो सिजन निकै सफल भएको थियो। सिरिजको दोस्रो सिजनमा पनि अभिशेक, मञ्जु देवी र प्रधान पतिबीचको ‘केमिस्ट्री’ प्रस्तुत गरिएको निर्देशक मिश्रले बताएका छन्।
