चितवन कांग्रेसका निवर्तमान सभापति जित नारायण श्रेष्ठले फेरि धोका नदिन माओवादी केन्द्रका अध्यक्ष प्रचण्डको ध्यानाकर्षण गराएका छन् ।
आज भरतपुरमा भएको गठबन्धनको चुनावी सभालाई सम्बोधन गर्दै श्रेष्ठले प्रचण्डलाई सो ध्यानाकर्षण गराएका हुन् ।
उनले भने, ‘हामी भरतपुरमा रेणु दाहालसहित गठबन्धनलाई हामी चितवनमा जिताउँछौं । हाम्रा सोझा सभापति जे बोल्नुहुन्छ, त्यही गर्नुहुन्छ । भोलिका दिनमा पहिलेका जस्तो ढाँट्ने कायम नहोस् । आज भन्दा ५ वर्षअघि गरेका यहीँ आएर गठबन्धनका लागि भोट मागेका हौं । तीन महिनापछि टुट्यो ।’
यसअघिको चुनावमा कांग्रेससँग मिलेर माओवादीबाट प्रचण्डकी छोरी रेणु दाहाल विजयी भएकी थिइन् । तर, तीन महिनापछि प्रचण्डले एमालेसँग चुनावी एकता गर्दै पार्टी एकता गरेका थिए ।
कांग्रेस केन्द्रीय सदस्य टेकप्रसाद गुरुङले पनि प्रचण्डलाई सोही कुराको ध्यानाकर्षण गराए ।
उनले भने, ‘गठबन्धन निरन्तर जान्छ भनेर प्रतिज्ञा गर्नुपर्यो । अनि चितवनबासीलाई विश्वास हुन्छ । पदका लागि गठबन्धन गर्ने अनि पाएपछि छोेड्ने हो भने हामी कहिल्यै विश्वास गर्दैनौं ।’
