नेकपा माओवादी केन्द्रका अध्यक्ष प्रचण्डले एमालेसँग एकता गर्दा केपी शर्मा ओलीले दुई हप्तादेखि नै धोका दिन थालेको गुनासो गरेका छन् ।
आज काठमाडौंमा भएको गठबन्धनको चुनावी सभालाई सम्बोधन गर्दै उनले सो बताएका हुन् । उनले भने, ‘एमालेसँगको एकता निकै तितो, नमिठो भयो । एकता भएको दुई हप्तादेखि केपी ओलीले धोका, बेइमानी दिनुभयो ।’
ओलीलाई नायकको भूमिकामा लगिएको तर खलनायक भएको प्रचण्डले आरोप लगाए । उनले ओलीलाई षड्यन्त्रकारीको संज्ञा दिए । उनले भने, ‘एकता गर्दा षड्यन्त्रकारीको फेला परियो ।’
उनले ओलीलाई सच्याउन सकिन्छ भनेर लागेको तर त्यसो नसकिएको बताए ।
उनले अबको चुनाव संविधानविरोधी, प्रतिगमनकारी र परिवर्तन तथा प्रगतिको पक्षधरबीच हुने बताए ।
प्रचण्डले महिला उम्मेदवारहरुलाई छोरी र श्रीमतीको रुपमा प्रचार गरेको भन्दै असन्तुष्टि जनाए । ‘दुई मेयरका प्रत्यासीबारे एकथरी मान्छेहरुले नकारात्मक टिप्पणी नगरेका होइनन्,’ उनले भने, ‘कसैलाई छोरीका रुपमा, कसैलाई श्रीमतीको रुपमा प्रचार गरेर महिलाहरुलाई अपमानित गर्ने, महिलाभित्रको क्षमतालाई अवमूल्यन गर्ने एकथरी मान्छेहरुको कोसिस छन् ।’
