नेपाली कांग्रेसले एमाले अध्यक्ष केपी शर्मा ओलीको चर्को आलोचना गरेको छ।
ओलीले आइतबार पत्रकार सम्मेलन गरेर सार्वजनिक गरेको ६७ बुँदे अपीलमा कांग्रेसमाथि गम्भीर आरोप लगाएको भन्दै सोमबार पार्टी कार्यालयमा आयोजित काउन्टर पत्रकार सम्मेलनमा प्रवक्ता प्रकाश शरण महतले ओलीको चर्को आलोचना गरे।
ओली झूठको पुलिन्दा भएको र ओलीले कांग्रेसमाथि झुटा आरोप लगाएको उनले बताए।
एमालेले कांग्रेसले बनाएको नीतिको ब्याज र साँवा खाइरहेको उनले आरोप लगाए। ‘हामीलाई नीति नभएको पार्टी रे। कांग्रेसकै नीतिको ब्याज र साँवासमेत खाने पार्टी एमाले हो’, उनले भने, ‘ओलीजीले झुटो आरोपका पुलिन्दा लगाउनुभएको छ। झुटमाथि झुट।’
ओलीले प्रधानमन्त्री हुँदा संविधान र कानूनको धज्जी उडाएको पनि उनले बताए । कांग्रेस प्रवक्ता महतले ओलीले आफ्ना कमजोरी ढाकछोप गर्न कांग्रेसमाथि अनावश्यक आरोप लगाएको बताए।
डा. महतले ओली सरकारमा भइरहेको भए नेपाल अहिले श्रीलंका भइसक्ने बताए। ओलीले कमल थापा र राजेन्द्र लिङ्देनहरुसँग मिलेर दक्षिणपन्थी बाटो लिएको आरोपसमेत उनले लगाए ।
