नेकपा माओवादी केन्द्रका अध्यक्ष पुष्पकमल दाहाल प्रचण्डले गठबन्धनभित्र असमझदारी बनाउन राजावादी, अतिवादी, प्रतिगामी सक्रिय रहेको बताएका छन्।
धनगढीमा सत्ता गठबन्धनले आयोजना गरेको चुनावी सभालाई सम्बोधन गर्दै माओवादी अध्यक्ष दाहालले यस्तो बताएका हुन्।
उनले, ‘अहिले कयौँलाई गठबन्धन गरेको देखेर सैह्य भएको छैन। गठबन्धनभित्र असमझदारी बनाउन राजावादी, अतिवादी, प्रतिगामी सक्रिय छन्। अहिले पनि ती तत्त्वहरू कुनै न कुनै रूपमा लागेका छन्। शेरबहादुर देउवा, मेरो र माधव नेपालको बिचमा असमझदारी बनाउनका लागि निकै ठुलो कसरत भइरहेको छ। दृढताको साथ गठबन्धनको पक्षमा लागेकोमा देउवाजीलाई धन्यवाद दिन चाहन्छु ।’
गठबन्धनलाई सिध्याउनका लागि सुरुदेखि नै एकथरी तत्त्व लागेको उनले बताए।
यस्तै प्रचण्डले गठबन्धनले देशलाई दुर्घटनाबाट बचाएको दाबी गरे। उनले भने, ‘कोही कसैले भ्रममा नपरे हुन्छ, गठबन्धनले देशलाई दुर्घटनाबाट बचाएकै हो। भोलिका दिनमा पनि देशमा हुनसक्ने राजनीतिक दुर्घटनाबाट बचाउने प्रतिबद्धता गरेको छ।’
