पूर्व प्रधानमन्त्री तथा नेकपा (माओवादी केन्द्र) का अध्यक्ष प्रचण्डले विजयलाई विकास, समृद्धि र जनताको हितमा बदल्ने सङ्कल्प गर्ने बेला भएको बताएका छन्।
भक्तपुरको मध्यपुर थिमी नगरपालिकामा पाँच दलीय गठबन्धनको तर्फबाट विजयी उम्मेद्वारलाई शनिवार बिहान निवास खुमलटारमा बधाई दिँदै उनले यस्तो बताएका हुन्।
प्रचण्डले मूलभूत रुपमा गठबन्धन सफल भएको र यो गठबन्धनलाई आउने प्रदेश र संघीय निर्वाचनसम्म लैजाने बताए। त्यसपछि देशको विकास र समृद्धिको यात्रामा पनि लिएर जाने सङ्कल्पमा गठबन्धनका दलहरु दृढ रहेको उनले बताए।
प्रचण्डले भने, ‘हामीले गठबन्धनबाट देशको राजनीतिमा परिवर्तन वा स्थायित्व र विकासको नयाँ यात्रा शुरु गर्न खोजेको हो। मूलभूत रुपमा गठबन्धन सफल भएको हो। हामी यो गठबन्धनलाई आउने प्रदेश र संघीय निर्वाचन र त्यसपछि देशको विकास र समृद्धिको यात्रामा पनि लिएर जाने सङ्कल्प हो। यसमा हामी गठबन्धनका दलहरु दृढ छौं।’
उनले मध्यपुर थिमी भक्तपुरको एउटा ऐतिहासिक नगरपालिका भएको उल्लेख गर्दै जनताको पक्षमा हुने काम कारबाहीको प्रभाव र असर सिंगो भक्तपुरमा पर्ने बताए। मध्यपुर थिमीमा निर्वाचित जनप्रतिनिधिबाट राम्रो काम भए एकाधिकार भएर बस्नेहरुलाई पनि भोलिका दिन चुनौति दिन सकिने उनको धारणा थियो ।
उनले भने, ‘त्यहाँका जनताको विकास निर्माण, शिक्षा स्वास्थ्य रोजगारी, सफाई सूचना लगायतका तपाईंहरुका काम कारबाहीको प्रभाव सिंगै भक्तपुर, उपत्यका र देशैभरि पनि सन्देश दिने स्थानमा तपाईँहरु आउनुभएको छ ।’
अध्यक्षले विजयी जनप्रतिनिधिहरुलाई अब राम्रो काम गर्ने चुनौती रहेको तर्फ सचेत पनि गराए। उनले मध्यपुर थिमीमा गठबन्धनको मर्मलाई पक्डिन सफल भएको देखिएको बताए।
