काठमाडौं महानगरपालिकाको मेयर पदमा स्वतन्त्र उम्मेदवार बालेन शाह निरन्तर अगाडि बढेका छन्।
मतगणना सुरु देखिनै अग्रता लिइरहेका बालेनले उक्त लयलाई कायमै राखेका छन्।
झण्डै एक लाख मत गणना हुँदा बालेन शाह पहिलो, एमालेका केशव स्थापित दोस्रो र कांग्रेसकी सिर्जना सिंह तेस्रो नम्बरमा छन्।
यस्तो छ पछिल्लो मतपरिणामः
बालेन शाह – ३३६२४
केशव स्थापित – १८१८९
सिर्जना सिंह – १८०५४
हालसम्म मतगणना भएका र भइरहेका अधिकांश वडामा बालेनको अग्रता छ।
तर, ‘कोर एरिया’ भनेर चिनिन काठमाडौं महानगरपालिका– २७ र वडा नम्बर २५ मा बालेन पछाडि भए पनि प्रतिस्पर्धि मत पाइरहेका छन्।
काठमाडौं महानगरपालिका– २७ मा अहिलेसम्म २ हजार ७१७ मत गणनामा स्थापितले ८०४ मत पाएर अग्रता बनाएका छन्। उनलाई कांग्रेसकी सिर्जना सिंहले ६९५ मतका साथ पछ्याइरहँदा स्वतन्त्र उम्मेदवार शाहले ४३८ मत प्राप्त गरेका छन्। यहाँ अर्का स्वतन्त्र उम्मेदवार सुमन सायमीको आँखिझ्यालले ३१७ मत पाएको छ।
वडा नम्बर २५ मा पनि स्वतन्त्र उम्मेदवार बालेन तेस्रो नम्बरमा छन्। जहाँ अर्का स्वतन्त्र उम्मेदवार सायमीको आँखिझ्यालले अग्रता लिइरहेको छ ।
हालसम्म १ हजार ९६५ मतको गणनामा आँखिझ्यालमा ४७३ मत परेको छ भने उनलाई एमाले उम्मेदवार स्थापितले ४५२ मतका साथ पछ्याइरहेका छन्। यहाँ बालेनको २९४ मत पर्दा कांग्रेसकी सिर्जना सिंहले २६७ मत प्राप्त गरेकी छन्।
‘कोर एरिया’ मा अर्का स्वतन्त्र उम्मेदवार सुमन सायमीले मत बढाउँदा अन्य उम्मेदवारले बालेनसँगको मतान्तर घटाउन पाएका छैनन्।
अहिले पनि बालेन एमालेका स्थापित भन्दा साढे १५ हजार मतले अघि छन्।
