सशस्त्र प्रहरीका पूर्व नायव महानिरीक्षक (डीआईजी) रञ्जन कोइराला पक्राउ परेका छन्। काठमाडौंको बानेश्वरबाट शुक्रबार साँझ पक्राउ गरिएको नेपाल प्रहरीका प्रवक्ता विष्णुकुमार केसीले बताए।
सर्वोच्च अदालतले फैसाल उल्टाएको भोलिपल्टै प्रहरीले कोइरालालाई पक्राउ गरेको हो।दश वर्षअघि श्रीमती गीता ढकालको हत्या गरेको अभियोगमा काठमाडौं जिल्ला अदालतले जन्मकैदको सजाय सुनाएको थियो। उच्च अदालतले त्यसलाई सदर गरेपछि उनी सर्वोच्च अदालत पुगेका थिए।
गत असारमा सर्वोच्च अदालतले उनको सजाय घटाउने फैसला गरेको थियो। त्यसपछि उनी गत साउन १४ गते डिल्लीबजार कारागारबाट रिहा भएका थिए।
महान्यायाधिवक्ताको कार्यालयले त्यसविरुद्ध सर्वोच्चमा पुनरावलोकन गरेको थियो। त्यसमाथि भएको सुनुवाइमा बिहीबार सर्वोच्च अदालतको पूर्ण इजलासले कोइरालाको कैद घटाउने फैसला उल्टाएको थियो। सर्वोच्च अदालतले फैसला उल्टाएसँगै उनले घर छोडेका थिए। बानेश्वरस्थित आफन्तको घरमा बसिरहेको अवस्थामा उनलाई पक्राउ गरिएको प्रवक्ता केसीले बताए।
