बीरगञ्ज। युवतीलाई विवाहको प्रलोभन देखाएर जबरजस्ती करणी गरी बेचबिखन गर्न खोजेको आरोपमा जिल्ला प्रहरी कार्यालय पर्साले एक महिलासहित ३ जनालाई पक्राउ गरेको छ।
पक्राउ पर्नेमा मोरङको कटहरी गाउँपालिका–४ स्थायी घर भई हाल पर्साको वीरगञ्ज महानगरपालिका–८ स्थित एक रेस्टुरेन्टमा काम गर्ने २५ वर्षीय सुरज कुमार साह, जुम्लाको हेमा गाउँपालिका–३ जोगीवडा स्थायी घर भई हाल वीरगञ्ज महानगरपालिका–१६ फूलबारी टोलमा बस्ने ३५ वर्षीय हरिश्चन्द्रनाथ योगी र वीरगञ्ज महानगरपालिका–१६ नयाँ बस पार्कमा सञ्चालित कार्की होटेलकी सञ्चालिका ४२ वर्षीया लक्ष्मी बुढाथोकी (कार्की) रहेका छन्।
काठमाडौं बस्ने २५ वर्षीय युवतीलाई विवाह गर्ने प्रलोभन देखाएर जेठ ५ गते वीरगञ्ज बोलाई बसपार्कस्थित कार्की होटेलमा लगी सुरजले पटक पटक बलात्कार गरेर जेठ ९ गते युवतीलाई होटेलकी सञ्चालिका लक्ष्मीको जिम्मा लगाई फरार भएको अनुसन्धानको क्रममा खुलेको जिल्ला प्रहरी कार्यालय पर्साका प्रवक्ता एवं डिएसपी ओम प्रकाश खनालले बताए।
जेठ १० गते लक्ष्मीले हरिश्चन्द्रनाथ योगीले महिलालाई बिहे गर्ने भन्दै अभियुक्तको कोठामा पठाएको र निजले युवतीलाई आफ्नो कोठामा लगी मानसिक र शारीरिक यातना दिएर पटक पटक जबरजस्ती करणी गरी कोठामै बन्धक बनाएर राखेको प्रहरीद्वारा जारी प्रेस नोटमा उल्लेख गरिएको छ।
सोही क्रममा जेठ १४ गते राति युवती उक्त स्थानबाट भागेर आफन्तको सम्पर्कमा आएसँगै जिल्ला प्रहरी कार्यालय पर्सामा उजुरी दिएको र प्रहरीले तत्काल घटनाको बारेमा अनुसन्धान शुरु गरी अभियुक्तहरूलाई वीरगन्जका विभिन्न स्थानबाट पक्राउ गरी जबरजस्ती करणी र मानव बेचबिखन तथा ओसारपसार कसुरमा आवश्यक अनुसन्धान अघि बढाइएको छ।
