प्रहरीले नेपालगञ्जको धम्बोजीस्थित वीरेन्द्रचोकमा पूर्व राजा वीरेन्द्र शाहको शालिक हटाएकोप्रति राप्रपाले आपत्ति जनाएको छ।
राप्रपाका अध्यक्ष राजेन्द्र लिङ्देनले सामाजिक सञ्जालमा स्टाटस लेख्दै पूर्व राजा शाहको शालिक राख्न खोज्दा प्रहरीले हटाएकोप्रति आपत्ति जनाएका छन्।
उनले नेपालगञ्जमा जनस्तरबाट पुनःस्थापित स्व.राजा वीरेन्द्रको शालिकमाथि सरकार पक्षबाट भएको तोड्फोड तथा जनसाधारणमाथिको धरपकड सम्बन्धि घटनामा राप्रपाको गम्भीर ध्यानाकर्षण भएको उल्लेख गरेका छन्।
पक्राउ परेका सबैलाई तत्काल रिहाई गर्न तथा इतिहासको सम्मान गर्न नेपाल सरकारसँग माग गरेका छन्।
बिहीबार वीरेन्द्रचोकमा राजावादी समूहले पूर्वराजा शाहको शालिक राख्न खोज्दा प्रहरीले हटाएको थियो। सो क्रममा त्यहाँ केही समय तनाव भएको थियो।
राप्रपा नेपालका अध्यक्ष कमल थापाले पनि नेपालगञ्जको धम्बोजीस्थित वीरेन्द्रचोकमा पूर्वराजा शाहको शालिक राख्न खोज्दा सरकारले अवरोध गर्नु ठीक नभएको बताएका थिए।
