बाँकेमा १६ वर्षीया किशोरीलाई सामूहिक बलात्कार गरेको आरोपमा ७ जना पक्राउ परेका छन्।
पक्राउ पर्नेमा बैजनाथ गाउँपालिका–८ बस्ने हेमराज थारु, राजकुमार थारू, विक्रान्त थारु, निराजन थारु, प्रविण थारु र सहयोगी विश्वनाथ थारु र निर्देशन थारु रहेका छन्।
प्रहरीका अनुसार थारू र १६ वर्षीय किशोरी फेसबुकमा चिनजान भएर एक वर्षदेखि प्रेममा थिए। बाँकेका प्रहरी प्रवक्ता डीएसपी मधुसुदन न्यौपानेका अनुसार हेमराजले नै बोलाएपछि सार्वजनिक बस चढेर ती किशोरी मानखोला पुगेकी थिइन्। उनीहरूले साँझ मानखोलाको फूलबारीमा पुगी जन्मदिन मनाउने भन्दै मदिरा खाए र किशोरीलाई समेत खुवाए।
किशोरी मदिराले लठ्ठिएपछि हेमराज, विक्रान्त, निराजन, प्रविण र राजकुमारले बलात्कार गरेका थिए। सामूहिक बलात्कारपछि बेहोस भएकी किशोरीलाई मध्यरातमै मोटरसाइकलमा राखेर बाँकेको बैजनाथ–८ पिपरीस्थित विक्रान्त थारुको बंगुर फर्ममा लगिएको थियो। त्यहाँ पनि विक्रान्त र निराजनले बलात्कार गरेका थिए।
बलात्कारपछि बेहोस अवस्थामै भे. ३ प ३५२७ नम्बरको मोटरसाइकलको बीचमा राखेर लैजाँदै गर्दा प्रहरीले उनीहरूलाई पक्राउ गरेको थियो।
