काठमाडौं। स्थानीयवासीको अवरोधका कारण काठमाडौं उपत्यकाको फोहोर व्यवस्थापनस्थल बञ्चरेडाँडामा विसर्जन हुन सकेको छैन।
गत सोमबार साँझ सहरी विकासमन्त्री, काठमाडौं महानगरपालिका, नुवाकोटको ककनी गाउँपालिका र धादिङको धुनीबेँसी नगरपालिकाका प्रतिनिधिबीच मङ्गलबारदेखि काठमाडौं उपत्यकाको फोहोर व्यवस्थापन गर्न सहमति गरे पनि सिसडोलका स्थानीयवासीले पुनः अवरोध गरेपछि फोहर व्यवस्थापन हुन नसकेको हो ।
उनीहरुले विगत तीन दिनदेखि लगातार अवरोध गर्दै आइरहेका छन्। बिहीबार काठमाडौंको फोहोर बोकेका गाडी बञ्चरेडाँडा ल्याण्डफिल साइट गएका छैनन्। सुरक्षाको प्रत्याभूति नभएपछि फोहोरका गाडी पठाउने नपठाउनेबारे अन्योल भएको छ।
प्रहरीहरु नै घाइते हुने गरी झडप भएपछि बुधबार गएका गाडी फोहोर नखसाली काठमाडौैं आएका थिए।
सहमतिअनुसार उपत्यकाबाट प्रहरीसहित फोहोर बोकेर बञ्चरेडाँडा पुगेको गाडीलाई स्थानीयवासीले ढुङ्गामुढा गरेपछि प्रहरी र स्थानीयवासीबीच झडपसमेत भएको थियो।
मुख्यगरी बञ्चरेडाँडाका स्थानीयवासीले प्रभावित क्षेत्र किटान गरी बस्ती स्थानान्तरण गर्न केन्द्र सरकारसँग माग गर्दै आएका छन्। त्यसैगरी प्रभावित स्थानीयवासीलाई रोजगारीको व्यवस्था, स्वास्थ्य बीमा, शिक्षाको पहुँच हुनुपर्नेजस्ता माग रहेको छ।
केन्द्र सरकार र कामपाले आफूहरुमाथि विगत १७ वर्षदेखि झुटको खेती गर्दै आएको आरोप लगाउँदै जनप्रतिनिधिसँगको सहमतिले मात्र फोहर व्यवस्थापन गर्न नपाइने भन्दै त्यहाँका स्थानीयवासीले सहमतिको व्यवस्था गरी पटकपटक फोहर व्यवस्थापनमा अवरोध गरेका हुन्।
१७ वर्षअघि दुई वर्षका लागि भन्दै सिसडोलमा काठमाडौं उपत्यकाको १८ स्थानीय तहको फोहर विसर्जन गरिँदै आएको थियो। अहिले सिसडोलमा फोहर राख्न नमिल्ने अवस्था आएपछि सिसडोलभन्दा दुई किलोमिटर पर बञ्चरेडाँडामा अन्तिम फोहर व्यवस्थापनस्थल निर्माणको काम भइरहेको छ।
उक्त दीर्घकालीन फोहर व्यवस्थापनस्थल निर्माणको काम पूर्णरूपमा सम्पन्न नभइसकेको भए पनि पहिलो सेलको काम सकिएकाले फोहर व्यवस्थापन गर्न थालिएको हो। विगत ११ दिनदेखि उपत्यकाका १८ स्थानीय तहको फोहर व्यवस्थापन गर्न नसक्दा दुर्गन्ध फैलिएको छ भने आवतजावत गर्नसमेत समस्या भइसकेको छ।
