जनकपुरधाम। जिल्ला समन्वय समिति (जिसस) धनुषामा नेपाली कांग्रेसको प्यानल निर्विरोध निर्वाचित हुने भएको छ।
समितिको प्रमुखमा राजनन्द मण्डल राज निर्विरोध निर्वाचित हुने पक्का भएका छन्। जिसस प्रमुख, उपप्रमुखसहित सदस्यमा कांग्रेसको मात्र मनोनयन परेको छ।
धनुषाका मुख्य निर्वाचन अधिकृत ब्रजेश प्याकुरेलका अनुसार जिल्ला समन्वय समितिको उपप्रमुखमा सङ्गीतादेवी ठाकुरको मात्र उम्मेदवारी परेको छ। यसैगरी जिल्ला समन्वय समितिका सदस्यहरूमा ईश्वरीप्रसाद शर्मा, डम्बरबहादुर थापामगर, फगु यादव, महिला सदस्यमा गीतादेवी यादव, विकादेवी मिजार, सोनितादेवी सदा र दलित तथा अल्पसङ्ख्यक सदस्यमा महेन्द्र महतोको उम्मेदवारी परेको छ।
धनुषाका अधिकांश पालिकाहरूमा कांग्रेस नै निर्वाचित भएकाले बहुमत भएको अवस्था रहेकाले अन्य कुनै पनि दलले उम्मेदवारी दर्ता नगराएको मुख्य निर्वाचन अधिकृत प्याकुरेलले जानकारी दिए।
मुख्य निर्वाचन अधिकृतको कार्यालयले जिल्ला समन्वय समितिको निर्वाचन कार्यतालिकामा जेठ २८ गते चुनावको मिति तय गरेकोमा अव सबै पदमा एक जनाको उम्मेदवारी दर्ता गरेकाले निर्वाचितको औपचारिक घोषणा गर्न बाँकी मात्र रहेको छ।
