काठमाडौं। भक्तपुरमा एक जना पुरूषको हत्या भएको छ।
मध्यपुर थिमी–८ बस्ने ५१ वर्षीय कल्याण साहको हत्या गरिएको अवस्थामा शव फेला परेको प्रहरीले जनाएको छ। उनको शव आइतबार मध्यपुर थिमी नगरपालिका–८ बोडस्थित लर्डबुद्ध स्कुल अगाडिको निर्माणाधिन टहरामा फेला परेको हो।
जिल्ला प्रहरी परिसर भक्तपुरका प्रहरी नायब उपरीक्षक राजु पाण्डेले साहको शव हत्या गरिएको अवस्थामा रगताम्य अवस्थामा फेला परेको जानकारी दिए। प्रहरीका अनुसार साहको टाउकोमा काठको फर्माले हिर्काएर हत्या गरेको तथा घटनास्थल नजिकैबाट रगत लागेका फर्मा भेटिएको छ।
प्रहरीले हत्या आरोपमा केही व्यक्तिलाई पक्राउ गरे पनि नाम सार्वजनिक गरेको छैन। उनीसँग घटनाबारे सोधपुछ भइरहेको छ।
घटनाको प्रहरी वृत्त थिमीले अनुसन्धान गरिरहेको र शवको पोष्टमार्टमको लागि केएमसी अस्पताल दुवाकोटमा राखिएको छ।
