काठमाडौं। नेपाली कांग्रेसका महामन्त्रीद्वय गगन थापा र विश्वप्रकाश शर्माले अमेरिकी स्टेट पार्टनरसिप प्रोग्राम (एसपीपी)को विषय सबैका लागि बन्द गर्न प्रधानमन्त्रीलाई आग्रह गरेका छन्।
सोमबार कांग्रेस समापति समेत रहेका प्रधानमन्त्री शेरबहादुर देउवालाई बालुवाटारमा भेट्दै महामन्त्रीद्वय थापा र शर्माले एसपीपीको विषय सबैका लागि बन्द गर्न आग्रह गरेका हुन्।
प्रधानमन्त्री शेरबहादुर देउवालाई संयुक्त रुपमा भेटेर उनीहरुले सोमबार एसपीपीको विषय ‘क्लोज’ गर्न आग्रह गरेका हुन्।
प्रधानमन्त्री देउवासँग गरेको भेटबारे महामन्त्री शर्माले भने, ‘एसपीपी सम्बन्धमा सरकारको तर्फबाट आवश्यक प्रक्रिया पुर्याएर यो प्रकरण सदाको लागि बन्द गरिदिनुस्। विदेश नितिको अन्य सन्दर्भमा पनि प्रमुख प्रतिपक्ष लगायत राजनीति दललाइ बोलाए साझा धारणा तय गर्न प्रारम्भ गरौं।’
साथै, उनीहरुले विदेशमा रहेका नेपाली नागरिकका लागि मतदानको व्यवस्था मिलाउन आग्रह गरे।
छलफलका क्रममा पार्टीको आन्तरिक विषय, नीति महाधिवेशन, केन्द्रीय समितिको बैठक, विभाग गठन, भ्रातृ संस्थाको नेतृत्व चयन तथा पूर्णता दिने विषयमा छलफल भएको बताइएको छ।
