काठमाडौं। बिहे गर्ने प्रलोभनमा बलात्कारपछि एक लाख रुपैयाँ लुटेर फरार एकजना पक्राउ परेका छन्।
पक्राउ पर्नेमा काभ्रेको तेमाल गाउँपालिका–९ घर भई बनेपामा डेरा गरी बस्दै आएका ३० वर्षीय भोटे भनिने विश्व तामाङ रहेका छन्।
उनी जेठ २९ गते राति ललितपुरकी २४ वर्षीया महिलालाई फकाएर बिहे गर्ने प्रलोभन देखाएर बलात्कारपछि एक लाख रुपैयाँ लुटेर फरार भएका थिए।
सामाजिक सञ्जाल इमोमा चिनजान भएको दुई सातामै उनले ती युवतीलाई काठमाडौं भोटेबहालको एक गेस्ट हाउसमा लगे, त्यहाँ पेय पदार्थमा मिसाएर उनले लठ्ठयाउने औषधि खुवाइदिए। युवती लठ्ठिएपछि बलात्कार गरेर र उनको साथमा रहेको एक लाख रुपैयाँ, दुई तोला सुन र एउटा मोबाइल पनि लुटेर फरार भए।
तत्कालै ती महिलालाई परोपकार प्रसुती गृह लगेर उनको विस्तृत स्वास्थ्य र शारीरिक परीक्षण गराई अनुसन्धानको थालेको प्रहरीले जनाएको छ।
पीडकको नाम, थर, ठेगाना समेत थाहा नभएको, उनको फोटो समेत नरहेको र गेष्ट हाउसमा बस्दासमेत पीडित महिलाकै परिचयपत्र, मोबाइल नम्बरमार्फत डाटा इन्ट्री गराएको पाइएको थियो।
उनीमाथि मुलुकी अपराध (संहिता)अनुसार कारबाही गर्न अनुसन्धानका लागि काठमाडौं जिल्ला अदालतबाट ७ दिनको म्याद थप लिइ अनुसन्धान भइरहेको प्रहरीले जनाएको छ।
