काठमाडौं। चिकित्सकको अनुमतिबिना दूर्व्यसनीलाई लागूऔषध बेचेको आरोपमा फार्मेसी सञ्चालकसहित चार जना पक्राउ परेका छन्।
पक्राउ पर्नेमा धादिङ गंगाजमुना गाउँपालिका–५ घर भई हाल काठमाडौं तारकेश्वर नगरपालिका–५ लोलाङस्थित गंगाजमुना फार्मेसी संचालक डिल बहादुर कार्की, नुवाकोट ककनी गाउँपालिका–१ का राज कुमार तामाङ, २२ वर्षीय सानु तामाङ र काठमाडौं तारकेश्वर नगरपालिका–५ गोलढुङ्गा बस्ने २४ वर्षीय संजय पुतुवार रहेका छन्।
लागूऔषध दूर्व्यसनमा परेका ब्यक्तिहरुलाई चिकित्सकको अनुमति बिना औषधि बेचबिखन गरेको आरोपमा उनीहरुलाई प्रहरीले पक्राउ गरेको जनाएको छ।
अनुसन्धानको क्रममा उनीहरुले गंगाजमुना फार्मेसीमा बिना इजाजत अवैध रूपमा औषधिहरु वेचबिखन गर्ने गरेको भेटिएको छ।
फार्मेसीबाट स्पास्पेन ४५० ट्याब्लेट, ट्रमा २४० ट्याब्लेट र ट्रमाडोल ५ सय क्याप्सुल प्रहरीले बरामद गरेको छ।
उनीहरूलाई थप अनुसन्धान तथा कारबाहीको लागि औषधि व्यवस्था विभाग पठाइएको छ।
