काठमाडौं। नेकपा एमालेका अध्यक्ष केपी शर्मा ओलीले अलोकतान्त्रिक शक्तिहरूले राजनीतिक दलहरूलाई अलोकप्रिय बनाउन खोजिरहेको आरोप लगाएका छन्।
ललितपुरमा आज सम्पादकहरूसँग अन्तरक्रिया गर्दै अध्यक्ष ओलीले अलोकतान्त्रिक शक्तिहरूले राजनीतिक दलहरूलाई अलोकप्रिय बनाउन खोजिरहेको आरोप लगाएका हुन्। उनले दलहरुबीच अस्वास्थ्य प्रतिस्पर्धा बढेको बताए।
ओलीले सङ्घीयता जनतालाई सेवा सुविधा उपलब्ध गराउने प्रणाली भए पनि अहिले मन्त्री पदका लागि जागिर खाने थलो भएको भन्दै असन्तुष्टि जनाए। तर, उनले संघीयतालाई सफल पार्नुपर्नेमा जोड दिए।
अध्यक्ष ओलीले देशमा वैदेशिक मुद्राको सञ्चिति नभएको, नयाँ काम गर्न बैङ्कहरूबाट कर्जा लिने अवस्था नभएको र विकास निर्माणका लागि आवश्यक सामाग्री आयात गर्ने पनि रकम नभएको बताए। उनले उत्पादन बढाउन लगानी बढाउनुपर्ने भएपनि त्यो अवस्था अहिले नभएको र सबैले यसतर्फ गम्भीर बन्नुपर्ने बताए।
ओलीले सरकारको गतिविधि हेर्दा नेपालको आर्थिक स्थिति पनि श्रीलंकाको जस्तो संकटग्रस्त हुन सक्ने देखिएको बताए। ओलीले भने, ‘बजेट निर्माण वा अरू प्रकरणमा पृष्ठ भागबाट गरिएको समर्थन र दिइएको टेको त्यति सहज छैन। त्यसको प्रभाव भनेको हामी कम्तीमा पनि श्रीलङ्कासम्म पुग्ने नै लक्षण हो। त्योभन्दा अघि पनि जान सक्छौँ। यस अधोगतिमा ब्रेक नलगाउने हो भने त्योभन्दा उँधो पनि जान सक्छ। अहिले नै सतर्क हुनुपर्ने छ।’
उनले वर्तमान सरकार मृत भइसकेको भन्दै अब यसलाई बोकेर हिँड्न नहुने बताए।
