काठमाडौं। नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले संघीयतालाई खारेजी नभइ व्यवस्थित र मजबुद बनाउनुपर्ने बताएका छन्।
नेपाल विज्ञान तथा सूचना प्रविधि सम्बन्धी नीति बहस कार्यक्रमलाई बिहीबार सम्बोधन गर्दै प्रचण्डले संघीयतालाई खारेजी नभइ व्यवस्थित र मजबुद बनाउनुपर्ने बताएका हुन्।
पछिल्लो समय केही नेताहरुले संघीयता खारेज हुनुपर्छ भनिरहेको भन्दै उक्त कदम निरंकुश राजतन्त्रतर्फको यात्रा भएको प्रचण्डले टिप्पणी गरे।
प्रचण्डले भने, ‘आज भोलि केही नेताहरु संघीयता खारेज गर्नुपर्छ भनेर बोलिरहेका छन्, त्यो भनेको निरकुशं राजतन्त्रकै दिशामा फेरी जाने भन्ने हो। स्थानीय र प्रदेश सरकारलाई अझ व्यवस्थित र मजबुद बनाउनुपर्यो। प्राकृतिक स्रोत साधनमाथी जनताको हक अधिकारलाई सुनिश्चित गर्नेतर्फ केन्द्रीत हुनुपर्छ।’
उनले वाम एकताको उपादेयता नसकिएकोसमेत बताए। उनले यसअघि पनि आफू वाम एकताको प्रस्तावक र अझै पनि यसको प्रस्तावक हुने बताए।
त्यसबारे उनले भने, ‘नेपालमा वैज्ञानिक विचार राख्नेहरू कम्युनिष्टहरू नै हुन्। अझै पनि वैज्ञानिक समाज निर्माणका लागि इमान्दार सोच राख्ने वामपन्थी साथीहरू एकठाउँमा आउनैपर्छ, त्यसको आवश्यकता र उपादेयता सकिएको छैन। हिजो पनि म यसको प्रस्तावक थिएँ, अझै पनि मै यसको इमान्दार प्रस्तावक हुन्छु।’
उनले विचार र विज्ञानलाई भौतिक शक्तिका रूपमा रूपान्तरण नगरी अहिलेका मुलुकहरूमा कुनैखाले क्रान्ति र विकास नहुने दाबी गरे।
