काठमाडौं। एमालेले सांसद विद्या भट्टराईलाई उपसभामुख पदका लागि उम्मेदवार बनाएको छ।
यसअघि एमालेले उम्मेदवार नै नउठाएर लोकतान्त्रिक समाजवादी पार्टी (लोसपा)की चन्दा चौधरीलाई सघाउने तयारी गरेको थियो। तर, अन्तिम समयमा एमालेले आफैं उम्मेदवार उठाउने निर्णय गरेको हो।
एमाले संसदीय दलका उप नेता सुवासचन्द्र नेम्वाङले एमालेबाट उपसभामुखको उम्मेदवार विद्या भट्टराई भएको जानकारी दिए। भट्टराईले केहीबेरमा उम्मेदवारी दर्ता गर्दैछन्।
उपसभामुख पदमा सत्ता गठबन्धनबाट नेपाली कांग्रेसकी सांसद पुष्पा भुसालले भने उम्मेदवारी दर्ता गरिसकेकी छन्।
बिहीबार बिहान ११ बजेदेखि दिउँसो १ बजेसम्मका लागि मनोनयनको समय तोकिएको छ। मनोनयनपश्चात आजै दिउँसो साढे १ बजे उम्मेदवारको सूची प्रकाशन गर्ने कार्यसूची रहेको छ।
शुक्रबार दिउँसो ३ बजेदेखि उपसभामुख चयनका लागि मतदान सुरु हुनेछ।
तत्कालीन उपसभामुख शिवमाया तुमबाहाम्फेले राजीनामा दिएपछि करिब तीन वर्षदेखि यो पद रिक्त रहेको छ।
