काठमाडौं। नेकपा माओवादी केन्द्रका अध्यक्ष प्रचण्ड भारत प्रस्थान गरेका छन् ।
भारतीय जनता पार्टी (भाजपा)का अध्यक्ष जेपी नड्डाको निम्तोमा प्रचण्ड शुक्रबार भारत प्रस्थान गरेका हुन्।
भारत जानुअघि त्रिभुवन अन्तर्राष्ट्रिय विमानस्थलमा सञ्चारकर्मीहरुसँग कुरा गर्दै प्रचण्डले आफ्नो भ्रमण आकस्मिक नभएर राजनैतिक र सद्भावना भ्रमण भएको बताए। उत्साहका साथ भारत जान लागेको उनले बताए।
भारत भ्रमणको क्रममा देश र जनतालाई केन्द्रमा राखेर सीमा विवादका विषय, व्यापार सन्तुलन, दुई देशबीचको सम्बन्ध सुधार गर्ने विषयमा भारतीय पक्षसँग छलफल गर्ने उनले बताए।
उनले चिनियाँ कम्युनिस्ट पार्टीका विदेश विभाग प्रमुख नेपाल भ्रमण सकेर फर्किनु, प्रधानमन्त्री पत्नी आरजु देउवाको समेत भारत भ्रमण चलिरहेका बेला आफू भारत जानुमा कुनै साइनो नभएको समेत दाबी गरे।
केहीदिनअघि चिनियाँ कम्युनिष्ट पार्टीका विदेश विभाग प्रमुख लिउ जियानचाओसँगको भेटमा चीन भ्रमणको निम्तो आएको प्रचण्डले बताए। उनले छिट्टै चीन भ्रमण हुने पनि जानकारी दिए।
यस्तो छ कार्यतालिका
प्रचण्डको नयाँ दिल्लीस्थित दीनदयाल उपाध्याय मार्गमा रहेको भाजपा मुख्यालयमा भाजपा अध्यक्ष जेपी नड्डासँग भेटवार्ता हुनेछ। यस अवसरमा भाजपा विदेश विभाग प्रमुख विजय चौथाईवालेसहित केही अन्य शीर्षस्थ नेताहरूको उपस्थिति हुने बताइएको छ।
प्रचण्डसँग भारतका राष्ट्रिय सुरक्षा सल्लाहकार अजित डोभाल, विदेशमन्त्री एस जयशंकर र विदेश सचिव विनय मोहन क्वात्रासँग पनि भेट हुनेछ।
भारतका प्रधानमन्त्री नरेन्द्र मोदीसँग आइतबार भेट हुने सम्भावना छ।
प्रचण्डले दिल्ली बसाईको क्रममा एक सेमिनारमा प्रमुख वक्ताको रूपमासमेत सहभागी हुने बताइएको छ। त्यस्तै दिल्लीस्थित नेपाली राजदूतावासले प्रचण्डको सम्मानमा रात्रिभोजको आयोजना गर्नेछ।
अध्यक्ष प्रचण्ड साउन १ गते आइतबार स्वदेश फर्किनेछन्।
