काठमाडौं। नेपाल कम्युनिष्ट पार्टी माओवादी(केन्द्र) का अध्यक्ष प्रचण्डले अहिले अपनाइरहेको निर्वाचन प्रणालीबाट गणतन्त्र नै खतरामा भएको बताएका छन्।
नेपाल कम्युनिष्ट पार्टीका संस्थापक सदस्य नरबहादुर कर्माचार्यको स्मृतिमा आयोजना गरिएको कार्यक्रममा माओवादी अध्यक्ष प्रचण्डले भने, ‘अब यो चुनाव प्रणालीलृ हाम्रोे गणतन्त्र पनि खतरामा पार्छ। यसले देशलाई नराम्रो भुमरीमा पार्छ, भड्खालो मै लान्छ।’
उनले स्थानीय तहको चुनावमा नै गाउँपालिका अध्यक्षको लागि १० करोड रुपैयाँ खर्च भएको जानकारी पाएको उल्लेख गरे। साथै, उनले संघ र प्रदेश चुनावमा सांसदको खर्च एक अर्बमाथि हुने बताए।
अबको चुनाव जितेर आउनेहरु दलाल पुँजीपतीहरु हुने उनको भनाइ थियो। उनले आगामी निर्वाचनमा धेरैभन्दा धेरै रकम खर्च गर्न नसके चुनाव जित्नै नसक्ने अवस्था आउन सक्ने उनले बताए।
धेरै पैसा खर्च गर्न नसके र अनेक तडकभडक गर्न नजाने चुनाव जित्नै गाह्रो हुने अवस्था रहेको उनले बताए।
उनले चुनावमा खर्च गरेको पैसा मन्त्री भएपछि असुल्ने गरेको समेत खुलाए। उनले भने, ‘सांसद हुने बेला करोडौं खर्च गरेर सांसद किन हुन्छन् त मान्छे सांसद नभई मन्त्री प्रधानमन्त्री हुन पाउँदैन। मन्त्री र प्रधानमन्त्री हुन करोडौं खर्च गर्न पर्ने भयो। सांसद भइसकेपछि मन्त्री हुन त्यहाँ पनि अनेक खालका खेलहरु खेल्नुपर्यो। मन्त्री भएपछि लगानी उठाउनुपर्यो त्यत्रो लगानी गरिसकेको छ। अनि त्यहाँ भ्रष्टचार संस्थागत हुन्छ।’
