काठमाडौं। नेकपा माओवादी केन्द्रका नेता जनार्दन शर्मा फेरि अर्थमन्त्री बन्ने भएका छन्।
त्यसका लागि माओवादी केन्द्रको स्थायी कमिटी बैठक आज दिउँसो ३ बजे बस्दैछ। उक्त बैठकले अर्थमन्त्रालयमा फेरि शर्मालाई पठाउने निर्णय गर्नेछ ।
माओवादी केन्द्र अध्यक्ष पुष्पकमल दाहाल प्रचण्डले शर्मालाई नै अर्थमन्त्री बनाउनका लागि प्रधानमन्त्री शेरबहादुर देउवालाई नाम पठाइसकेका छन्। शर्माको शपथको कार्यक्रम प्रधानमन्त्री तथा राष्ट्रपतिको कार्यालयले तय गर्नेछ।
त्यसपछि उनले आजै साँझसम्म अर्थमन्त्रीको शपथ लिने तयारी भइरहेको छ।
पूर्व अर्थमन्त्री शर्माले आर्थिक वर्ष २०७९/८० को बजेट बनाउँदा एकजना पूर्वनायब सुब्बालाई जेठ १४ गते राति १२ बजे मन्त्रालयमा बोलाएर करका दरहरू हेरफेर गर्न लगाएको आरोप लागेको थियो।
उक्त विषयमा छानबिन गर्न ११ सदस्यीय संसदीय विशेष समिति गठन भएपछि शर्माले असार २२ गते राजीनामा दिएका थिए।
तर, छानबिन समितिले करका दर निर्धारणमा अनाधिकृत व्यक्ति प्रवेश गरेको नदेखिएको प्रतिवेदन सभामुखलाई बुझाएको थियो।
