काठमाडौं। जनार्दन शर्मा अर्थमन्त्रीमा नियुक्त भएका छन्।
राष्ट्रपति विद्यादेवी भण्डारीले प्रधानमन्त्री शेरबहादुर देउवाको सिफारिसमा शर्मालाई आइतबार अर्थमन्त्रीमा नियुक्त गरेकी हुन्।
"सम्माननीय राष्ट्रपति श्रीमती विद्यादेवी भण्डारीज्यूले सम्माननीय प्रधानमन्त्री श्री शेरबहादुर देउवाज्यूको नेतृत्वमा मिति २०७८/३/२९ गते गठित मौजुदा मन्त्रिपरिषद्मा नेपालको संविधानको धारा ७६ को उपधारा (९) बमोजिम सम्माननीय प्रधानमन्त्रीज्यूको सिफारिसमा श्री जनार्दन शर्मालाई मन्त्री पदमा नियुक्त गरी हाल सम्माननीय प्रधानमन्त्रीज्यूले सम्हाली आउनुभएको अर्थ मन्त्रालयको कार्यभार सम्हाल्नेगरी नियुक्ति एवं कार्यभार तोक्नुभएको छ," राष्ट्रपति कार्यालयबाट प्रकाशित वक्तव्यमा भनिएको छ।
माओवादी केन्द्र अध्यक्ष पुष्पकमल दाहाल प्रचण्डले शर्मालाई नै अर्थमन्त्री बनाउनका लागि प्रधानमन्त्री देउवालाई आइतबार बिहान नाम पठाएका थिए।
शर्माले आजै साँझ ६ बजे अर्थमन्त्रीको शपथ लिने कार्यक्रम तय भएको छ।
पूर्व अर्थमन्त्री शर्माले आर्थिक वर्ष २०७९/८० को बजेट बनाउँदा एकजना पूर्वनायब सुब्बालाई जेठ १४ गते राति १२ बजे मन्त्रालयमा बोलाएर करका दरहरू हेरफेर गर्न लगाएको आरोप लागेको थियो।
उक्त विषयमा छानबिन गर्न ११ सदस्यीय संसदीय विशेष समिति गठन भएपछि शर्माले असार २२ गते राजीनामा दिएका थिए। शर्माले राजीनामा दिएपछि प्रधानमन्त्री देउवाले नयाँ अर्थमन्त्री नियुक्त नगरी अर्थ मन्त्रालय आफैँसँग राखेका थिए।
तर, छानबिन समितिले करका दर निर्धारणमा अनाधिकृत व्यक्ति प्रवेश गरेको नदेखिएको प्रतिवेदन सभामुखलाई बुझाएको थियो।
