काठमाडौं। प्रतिपक्षी दल नेकपा (एमाले) ले महंगी र भ्रष्टाचारविरुद्ध विरोध प्रदर्शन गरेको छ।
सरकारले महंगी एवम् भ्रष्टाचार नियन्त्रणमा प्रभावकारी भूमिका खेल्न नसकेको आरोप लगाउँदै एमालेले सोमबार विरोध प्रदर्शन गरेको हो। अत्यधिक मूल्य वृद्धिले जनताको दैनिक जीवनयापनमा समेत समस्या भएको एमालेले जनाएको छ।
एमाले उपत्यका विशेष प्रदेश कमिटी, केन्द्रीय विभागहरु, उपत्यकाका स्थानीय जनप्रतिनिधिहरु, सम्पर्क मञ्चका सदस्य र सांसदहरु भएको प्रदर्शनमा सहभागी भए।
काठमाडौंको भृकुटीमण्डप, नरदेवी, असन, भोटाहिटीलगायत विभिन्न स्थानबाट र्याली प्रदर्शन गर्दै प्रदर्शनकारीहरु बसन्तपुर परिसर परिक्रमा गरेका थिए।
र्याली प्रदर्शनपछि पार्टी महासचिव शङ्कर पोखरेलले बजारमा महँगी बढेपछि सर्वसाधारण नागरिकले दुःख पाएको बताए। उनले मूल्यवृद्धि नियन्त्रणमा सरकारलाई ध्यान दिन आग्रह गरे।
पछिल्लो समय मूल्यवृद्धिले नागरिकलाई समस्या परेको भन्दै त्यसमा ध्यान दिन उनले सरकारसँग आग्रह गरे।
उनले यो सरकार रहिरहेमा नेपाल श्रीलंका बन्ने खतरा रहेको बताए। उनले आउने चुनावमा यो सरकारलाई परास्त गर्ने बताए।
