ताप्लेजुङ। नेपाल कम्युनिस्ट पार्टी एमालेका उपाध्यक्ष सुवासचन्द्र नेम्बाङले विचार मिल्नेहरुबीच आगामी निर्वाचनमा तालमेल गर्न आफ्नो पार्टी तयार रहेको बताएका छन्।
बुधबार ताप्लेजुङ सदरमुकाम फुङ्लिङमा पत्रकारहरुसँग कुरा गर्दै राजनीतिक मूल्य र मान्यतालाई आत्मसात् गर्दै विचार मिल्ने दलसँग चुनावी तालमेल (गठबन्धन) गर्न एमाले तयार रहेको उपाध्यक्ष नेम्बाङले बताएका हुन्।
नेता नेम्बाङले मिश्रित निर्वाचन प्रणालीमा कुनै एक दलले मात्र बहुमत ल्याउनसक्ने निश्चित नहुने हुँदा चुनावी तालमेल गर्नु अनौठो नभएको बताए। उनले हालको सत्ता गठबन्धनजस्तो नभई राजनीतिक विचार मिल्ने दलसँग मात्र एमालेले चुनावी तालमेल गर्नसक्ने बताए।
उनले अहिलको सत्ता गठबन्धन विभिन्न विचार भएको दलहरुबीचको गठबन्धन भएकाले त्यसलाई ‘दूषित गठबन्धन’ को संज्ञा दिए।
एमाले उपाध्यक्ष नेम्बाङले आगामी निर्वाचनमा एमाले पहिलो दल हुनेगरी निर्वाचित लक्षित योजनामा जुटिसकेको बताए। आफूसहित पार्टीका शीर्षनेताहरु निर्वाचन लक्षित कार्यक्रममा जुटेको बताउँदै उनले देशभर जित्ने पात्रलाई सङ्घ र प्रदेशको निर्वाचनमा उम्मेदवार बनाउने पार्टीको तयारी रहेको बताए।
