काठमाडौं। नेपाली कांग्रेसका सह–महामन्त्री तथा पूर्वमन्त्री महेन्द्र यादवले अब एमाले २० वर्षसम्म शासनमा नफर्कने ठोकुवा गरेका छन्।
आगामी निर्वाचनमा एमालेले एक सिटपनि नजित्ने उनको दाबी छ। आज (बिहीबार) रिपोर्टर्स क्लब नेपालले आयोजना गरेको साक्षात्कारमा बोल्दै उनले भने, ‘अब २० वर्षसम्म फेरि एमाले शासनमा फर्किन्छु भनेर त्यो आँट नगरे हुन्छ। अबको संसद्को निर्वाचनमा एक सिट चाहीँ आउने सम्भावना छ। केपी ओली जित्ने सम्भावना छ। त्यो पनि राप्रपासँग गठबन्धन गर्नुभयो भने। नभए कुनै हालतमा आउँदैन्। यसपटक एमाले शुन्यतिर जानसक्छ। हरेक मोर्चामा एमाले असफल भएको छ।’
उनले एमालेले राष्ट्रवादको नाममा जनता ठग्ने काम गरेको आरोप लगाए। उनले भने, ‘एमालेका साथीहरुलाई म भन्छु, अब राष्ट्रवादको नाममा नेपाली जनता ठग्ने कोशिस नगर्नुहोस्। किताब त छाप्नुभयो। किन पुर्याउनुभएन? स्कुलमा किताब देखिनँ। तुईन हटाउछु भन्नुभएको थियो, हट्यो त? तपाईँहरुले परराष्ट्र नीति सन्तुलित पनि बनाउन सक्नुभएन। यो सरकारले छोटो अवधिबाट देशलाई श्रीलंका हुनबाट बचाईदियो।’
उनले नागरिकता विद्येयक पास दुवै सदनबाट भैसकेको र प्रमाणिकरणका लागि राष्ट्रपतिकहाँ पुगेको सुनाउँदै तत्काल प्रमाणिकरण गर्न आग्रह गरे।
नेता यादवले अहिलेको पाँच दलीय गठबन्धन नेपाली जनताले आवश्यकता महशुस गरेर बनेको सुनाए। उनले यसअघि जनतामाथि धोका र विश्वासघात गरेको कारण अब केपी ओलीलई अब प्रधानमन्त्री बन्ने नैतिक आधार नै नभएको दाबी गरे।
यादवले वर्तमान सरकारले एक वर्षको छोटो अवधिमा तीन वर्षसम्म यसअघिको ओली सरकारले गर्न नसकेको काम गरेको दाबी गरे।
