काठमाडौं। मिटरब्याज सम्बन्धी अपराध नियन्त्रणका लागि सरकारले कार्यदल गठन गरेको छ।
प्रधानमन्त्री शेरबहादुर देउवाको निर्देशनमा गृहमन्त्री खाणले गृह मन्त्रालयका सहसचिव डा. भिष्म भूसालको संयोजकत्वमा ६ सदस्यीय कार्यदल गठन गरेका हुन्।
कार्यदलमा नेपाल प्रहरीका केन्द्रीय अनसुन्धान व्यूरोमा कार्यरत वरिष्ठ उपरीक्षक दिनेश आचार्य, गृह मन्त्रालयका कानुन उपसचिव श्रीकृष्ण पौडेल, नेपाल प्रहरीको अपराध अनुसन्धान शाखामा कार्यरत उपरीक्षक कृष्णप्रसाद कोइराला, राष्ट्रिय अनुसन्धान विभागका उप– अनुसन्धान निर्देशक मुकुन्द मरहठ्ठा सदस्य छन् भने सदस्य सचिवमा नेपाल प्रहरीको केन्द्रीय अनुसन्धान व्यूरोमा कार्यरत नायब उपरीक्षक रोशन खड्का रहेका छन्।
शुक्रबार बिहान प्रधानमन्त्री देउवाले मिटरब्याजी सम्बन्धी समस्या समाधानका उपायहरू पहिचान गरी अपराधीहरूलाई कानुनी कारबाहीको दायरामा ल्याउन र भविष्यमा यस्ता अपराध हुन नदिन आवश्यक पहल कदमी लिन निर्देशन दिएका थिए।
कार्यदलले एक महिनाभित्र प्रतिवेदन बुझाउनेछ।
