काठमाडौँ । काठमाडौँ महानगरपालिकाका मेयर बालेन शाहले माओवादी केन्द्रका अध्यक्ष पुष्पकमल दाहाल प्रचण्डलाई कसरी देश बनाउनुहुन्छ भन्दै प्रश्न गरेका छन् ।
उपत्यकाको फोहर लैजान प्रयोग गरिने ककनीको बाटो विगत आठ वर्षदेखि अलपत्र छाडेका मान्छेकै घरमा प्रचण्ड बस्ने भएकाले उनले यस्तो प्रश्न गरेका हुन् ।
उनले सामाजिक सञ्जाल फेसबुकमा लेखेका छन्, 'श्रीमान प्रचण्डज्यु ! उपत्यकाको फोहोर लैजान प्रयोग गरिने ककनीको बाटो बिगत ८ बर्ष देखि यस्तो हालतमा बनाउने मान्छेको घरमै अङ्गरक्षक जस्तो बसेर कुन नैतिकताले भन्नु हुन्छ म देश बनाउँदै छु भनेर ।'
ककनीको बाटोको ठेक्का प्रचण्डका घरबेटी भनेर चिनिने शारदा प्रसाद अधिकारीले लिएका थिए । उक्त बाटो अझैसम्म पनि बन्न सकेको छैन् ।
