तनहुँ। नेपाली कांग्रेसका वरिष्ठ नेता रामचन्द्र पौडेलले गृह जिल्ला तनहुँबाट नै निर्वाचन लड्ने घोषणा गरेका छन्।
शुक्रबार दमौलीमा सञ्चारकर्मीसँग कुरा गर्दै नेता पौडेलले तनहुँको क्षेत्र नम्बर १ बाट निर्वाचनमा उम्मेदवार बन्ने बताएका हुन्। आगामी मङ्सिर ४ गते प्रतिनिधिसभा र प्रदेशसभा सदस्य निर्वाचन हुँदैछ।
पौडेलले पार्टी सभापति शेरबहादुर देउवा र गृह जिल्लाका केन्द्रीय सदस्यहरुसँग यस विषयमा सहमति भइसकेकोले आफू तनहुँ १ बाट उम्मेदवार बन्ने बताए।
उनले भने, ‘‘मैले लड्ने भएपछि दाबी लाग्दैन, एकीकृत समाजवादीका अध्यक्ष माधवकुमार नेपालसँग पनि कुरा भएको छ। समाजवादीलाई अन्य स्थानमा व्यवस्थापन गरिने नेता पौडेलको भनाइ छ।
वरिष्ठ नेता पौडेल २०७४ सालको निर्वाचनमा तनहुँ क्षेत्र नम्बर १ मा तत्कालिन नेकपा (एमाले) का उम्मेदवार कृष्णकुमार श्रेष्ठ किसानसँग पराजित भएका थिए। श्रेष्ठ हाल नेकपा एकीकृत समाजवादीमा छन्।
नेता पौडेलले भने, ‘म तनहुँबाटै उम्मेदवार बन्ने हो म जहाँबाट चुनाव हारेको छु त्यहीबाट जितेर मात्रै मर्न चाहन्छु।’
