काठमाडौं। नेकपा (एमाले) को केन्द्रीय कमिटी बैठकका एजेण्डा तय गरेको छ।
बिहीबार बसेको एमाले पोलिटब्युरो बैठकले शुक्रबारबाट सुरू हुने केन्द्रीय कमिटी बैठकमा पेश हुने ११ एजेन्डा तय गरेको हो।
एमाले प्रचार विभाग प्रमुख पृथ्वीसुब्बा गुरूङका अनुसार केन्द्रीय कमिटी बैठकमा अध्यक्ष केपी शर्मा ओलीले आफ्नो राजनीतिक प्रतिवेदन पेश गर्नेछन्।
राजनीतिक प्रतिवेदनमा मुलुकको राजनीतिक स्थिति, सत्ता गठबन्धनका कारण अर्थतन्त्रमा परेको प्रभाव, स्थानीय चुनावको समीक्षा र आगामी चुनावी रणनीतिबारे समेटिएको ओलीले आजको बैठकमा जानकारी दिएका छन्।
बैठकमा चुनावको तयारी, थपिएका चार जना केन्द्रीय सदस्यको सपथ र कार्यविभाजन, सचिवालयले गरेका निर्णयहरुको अनुमोदन, उम्मेदवार छनोट प्रक्रिया र मापदण्ड, स्थानीय चुनाव भएको अन्तरघातबारे छानबिन गर्न बनेको कार्यदलको प्रतिवेदन पेश गर्ने पनि एजेण्डा रहेको छ।
त्यस्तै, पार्टीका ५२ हजार ५५० संगठित सदस्यहरुको नम्बर दोहोरिएकाले त्यसको व्यवस्थापन गर्ने, सल्लाहकार परिषद् र तीन आयोगको प्रतिवेदन पेश गर्ने, प्रवास कमिटीसम्बन्धी नियमावली बनाउने पनि बैठकको एजेण्डा रहेको छ।
