सिन्धुपाल्चोक। गैरकानुनी रूपमा बनेका संरचना हटाउन तथा बजार सरसफाइ गर्न निर्देशन दिँदै मेलम्ची नगरपालिकाले बजार अनुगमन गरेको छ।
नगर प्रमुख आइतमान तामाङले घर अगाडि बनाइएका भञ्याङ, व्यापारिक प्रयोजनका लागि हालिएका पालि तथा अन्य संरचना हटाउन निर्देशन दिइएको जानकारी दिए।
जिल्लाको पश्चिमी भेगको सबैभन्दा ठूलो बजार हो मेलम्ची। मेलम्ची घुम्न दैनिक सयौँ पर्यटक पनि आउने गरेका छन्। पर्यटकलाई आकर्षित बनाउन र सफा, सुन्दर अनि सुरक्षित बजार निमार्णका लागि यस्ता संरचना हटाउन आग्रह गरिएको नगर प्रमुख तामाङले बताए।
व्यवस्थित बजार बनाउन बजारवासी, उपभोक्ता र स्थानीय सरकारको भूमिका उत्तिकै महत्त्वपूर्ण हुने भन्दै पैदलयात्रु हिँड्ने बाटो मिचेर पसल राख्ने, जथाभाबी टहरा बनाउँदा बजार अव्यवस्थित तथा कुरूप बन्दै गएको स्थानीयवासीले बताएका छन्।
अहिले नगरपालिकाले गैरकानुनी रूपमा निर्माण गरिएका संरचना हटाउने, जथाभाबी फोहर फाल्न नदिने, बजारमा अस्तव्यस्त पार्किङ गर्न नपाइने भनेर सूचना निकालेको छ। नगरपालिकाको यो निर्णयको बजारवासीले स्वागत गरेका छन्।
नगरपालिकाको गत साउन ४ गतेको बैठकले १५ दिने सूचना जारी गरे पनि अहिलेसम्म कसैले पनि यस्ता संरचना हटाएका छैनन्।
