काठमाडौँ । नेकपा एमालेको पर्साको क्षेत्र नं १ बाट पत्रकार के.सी. लामिछानेलाई समानुपातिक सांसद उम्मेदवारमा नाम सिफारिस गरिएको छ ।
मङ्सिर ५ मा हुने सङ्घ र प्रदेश सदस्य निर्वाचनको लागि वीरगंजमा सम्पन्न पार्टीको क्षेत्रीय समन्वय समितिको बैठकले नेपाली पब्लिकका प्रधान सम्पादक समेत रहेका लामिछानेको नाम समानुपातिकबाट सङ्घीय सांसदका लागि सिफारिस गरिएको संयोजक लालबाबु शेखले जानकारी दिए ।
वीरगंजलाई कर्मथलो बनाएर पत्रकारितामा क्रियाशील लामिछाने नेपाल पत्रकार महासङ्घको केन्द्रीय कमिटीका सदस्य पनि हुन । दुई दशक भन्दा बढी समयदेखि पत्रकारितामा क्रियाशील पत्रकार लामिछाने पहिचान शालीन र बौद्धिक व्यक्तिका रुपमा स्थापित छन् ।
अनेरास्ववियूबाट राजनीतिमा क्रियाशील लामिछानेले अनेरास्ववियू र प्रेस चौतारी नेपालको केन्द्रीय तहमा रहेर काम गरिसकेका छन् । नेपाल पत्रकार महासङ्घ पर्साको सदस्य, सचिव अध्यक्ष मधेस प्रदेशको उपाध्यक्ष हुँदै हाल नेपाल पत्रकार महासङ्घमा प्रेस चौतारी नेपालको तर्फबाट विजयी एक मात्र केन्द्रीय सदस्य हुन् ।
उनै लामिछानेलाई शुक्रवार सम्पन्न नेकपा एमाले पर्सा क्षेत्र नं ३ को (क) प्रदेश समन्वय कमिटीको बैठकले प्रदेश सभाको समानुपातिक उम्मेदवारमा पनि सिफारिस गरेको छ । प्रत्यक्ष निर्वाचनका लागि आकाङ्क्षी रहेका लामिछानेलाई समानुपातिक तर्फ सिफारिस गरिएको हो ।
